Nr2. i PS-së është ndjerë trimufator ndaj nr.1 të PD-së, gjatë qëndrimit të të dyve paralel në Berlin.
Taulant Balla, deklaroi nga kryeqyteti gjerman se, sipas tij, balta e opozitës nuk po ngjit te politika berlineze.
“Për fat të keq, opozita shqiptare është munduar edhe në Gjermani të hedhë baltë mbi Shqipërinë dhe mbi rrugën europiane të saj, por unë jam i bindur që këtu kjo baltë nuk ngjit për sa kohë që vlerësimi është teknik”, tha Balla, duke argumentuar se qeveria shqiptare e ka krah atë gjermane mu për shkak të Reformës në Drejtësi. Në këtë pikë, Balla kujtoi se kjo reformë është dhe një investimi kancelares Merkel.
“Reforma në Drejtësi është kryefjala mbi të cilën bazohet argumentimi kryesor i hapit të rëndësishëm te ndarjes së Shipërisë nga tranzicioni i tejzgjatur. Reforma në Drejtësi është një garanci, jo vetëm për shtetin e së drejtës në Shqipëri, por është gjithashtu një garanci për investitorët gjermanë të cilat çdo ditë e më shumë shfaqin interes lidhur me mundësitë e investimit nga ana e tyre në Shqipëri.
Ashtu si Komisioni Europian edhe autoritetet gjermane vlerësojnë se ecuria e kësaj reforme është shumë e mirë.
Një numër i madh gjyqtarësh e prokurorësh nuk e kanë kaluar procesin e vettingut, për shkak të evidentimit të problematikave që lidhen, qoftë me pastërtinë e figurës, qoftë me pasurinë apo me përgatitjen profesionale, tregon sa e rëndësishme dhe sa domethënëse ka qenë kjo reformë.
Madje, siç theksohet edhe këtu në Gjermani, ky model i një reforme të thellë duhet të merret shembull edhe nga vendet e Ballkanit Perëndimor dhe jo vetëm.
Kujtoj këtu, se Reforma në Drejtësi është një investim dhe angazhim i kancelares Merkel, po ashtu edhe i qeverisë së SHBA, të cilët vazhdojnë ta ndjekin me vëmendje implementimin e kësaj reforme.
Edhe këtu nga Berlini dua ta them shumë qartë se kushdo politikan që është kundër kësaj reforme është automatikisht kundër rrugës europiane të Shqipërisë”, deklaroi Balla.
Si për të treguar epërsinë politike ndaj Bashës, Balla renditi dhe takimet e nivelit të lartë politik në Berlin, ku veçojnë ministra dhe anëtarë të Bundestagut. /tesheshi.com/
