Uellsiani Gareth Bale rezultoi edhe një herë vendimtar për Realin e Madridit në një transfertë mjaft të vështirë për të.
Pikërisht në momentet më kritike të La Ligës, kur çdo hap i gabuar është thuajse i pariparueshëm, Reali është mbështetur te Bale për të vijuar të rivalizojë për fitimin e kampionatit.
Pasi shënoi dy gola mjaft të vlefshëm të shtunën e shkuar ndaj Rajo Valekanos, në një ndeshje që Reali e fitoi falë tij, sot Bale i dha tre pikë të tjera skuadrës në “Estadio Municipal de Anoeta”, ku ajo mposhti 0-1 Real Sociedadin.
Pa Ronaldo-n dhe Benzema-në në fushë, madrilenët e patën të vështirë të ushtrojnë presion. Përndryshe, vendasve u mungoi goditja e fundit e saktë, çka mund ta kishte sjellë rezultatin në favor të tyre.
Bale shënoi në minutën e 80-të, saktësisht atëherë kur duhej. Tre pikët e siguruara ndaj Sociedadit i japin një kryesim të përkohshëm Realit në klasifikim, ndërsa Atletiko e Madridit dhe Barcelona luajnë po këtë mbrëmje. /tesheshi.com/
