Për herë të parë, një paciente në Shtetet e Bashkuara është infektuar me një bakterie rezistente ndaj antibiotikut që ishte përdorur si mjeti i fundit për të shëruar të sëmurën. Pacientja, një grua 49-vjeçare nga Pensilvania e mori veten, mirëpo zyrtarët e shëndetësisë druhen se nëse rezistenca ndaj antibiotikut shpërndahet edhe tek bakteriet e tjera, vendi mund të përjetojë shumë shpejt pushtimin nga supermikrobet që janë të pandalshme ndaj të gjithë antibiotikëve të njohur deri më tani.
“Ky është fundi i rrugës për antibiotikët, vetëm nëse ne veprojmë me urgjencë”, tha dr.Tom Frieden, drejtor i Qendrës për kontrollin dhe parandalimin e sëmundjeve në Uashington.
Vende të tjera tashmë kanë zbuluar ekzistencën e supermikrobeve që janë shndërruar në rezistente e që asnjë antibiotik nuk mund t’i luftojë. Deri më tani, kjo gjë nuk ishte vërejtur në Shtetet e Bashkuara. Por, tashmë rasti i Pensilvanisë ka hapur rrugën për këtë zhvillim edhe në Shtetet e Bashkuara, thanë zyrtarët.
Gruaja ishte paraqitur në një klinikë ushtarake në Pensilvani në muajin prill dhe ishte trajtuar për një infeksion të rrugëve urinare. Analizat e para gjetën se ajo kishte një infeksion me bakterien E coli, një lloj i zakonshëm mikrobesh që shfaqen në zorrë përpara se të shpërndahen edhe në fshikëzën e urinës.
Por, analizat treguan se ky bakter E coli ishte rezistent ndaj antibiotikëve të përdorur rëndom për infeksione të tilla. Gruaja u trajtua me sukses me një lloj tjetër antibiotiku.
Por ndërsa ajo u shërua, analizat e mëtejshme të përfunduara gjatë javës së fundit konfirmuan se E coli mbante gjenin rezistent ndaj medikamentit colistin.
Colistin është një antibiotik i vjetër. Deri në vitet 70’, mjekët pothuajse nuk e përdornin më për shkak të efektetve të ashpra anësore. Por trajtimi u risoll në skenë pasi antibiotikët e tjerë nisën të humbasin efektivitetin e tyre.
Ilaçi përdoret kundër bakterieve të ëvshtira që i rezistojnë vijës së fundit të mbrojtjes, antibiotikëve të quajtur carbapenems. Nëse këto bakterie arrijnë të marrin gjenin-rezistent ndaj colistinës, doktorët nuk do të kenë më mundësi të tjera për trajtimin e pacientëve, thonë zyrtarët.
“Kjo është një pjesë tjetër e një enigme të ëvshtirë që nuk do donim ta kishim”, tha Dr Beth Bell, që mbikqyr programet e sëmundjeve të reja për qendrën amerikane.
Qendra e kontrollit dhe parandalimit të sëmundjeve po punon me zyrtarët e shëndetësisë në Pensilvani për të intervistuar gruan dhe familjet e saj, në një përpjekje për të gjetur sesi ajo mund të jetë infektuar me atë lloj bakteri. Gruaja nuk kishte udhëtuar jashtë vendit, së fundmi, thanë zyrtarët.
Gjeni-rezistent ndaj colistinës është zbuluar më parë tek kafshët, por edhe tek njerëzit në Kinë, Europë dhe Kanada.
Përgatiti: Juli Prifti – /tesheshi.com/
