Kryesuesi i Dhomës së Popujve të Asamblesë Parlamentare të Bosnjë e Hercegovinës, Bakir Izetbegoviç ka deklaruar se zgjidhja mes Prishtinës dhe Beogradit nuk duhet të ndikojë në vendin e tij.
Izetbegoviç, i cili është lideri i partisë më të madhe boshnjake në vend, foli për krijimin e qeverisë të cilat vazhdojnë për më shumë se 10 muaj, si dhe për çështje tjera rajonale.
Duke iu referuar mosmarrëveshjeve aktuale në rajon, ai tha se nuk vlen ndërlidhja e çështjes së të ardhmes së Kosovës me atë të BeH-së.
“Por, ja që në politikë gjithçka është e mundur. Nëse ndonjëherë mund të ndërlidhen këto dy çështje, ky pazarllëk (polemikë) i yni në raport me Beogradin dhe Prishtinën, atëherë e përbashkëta është ajo që pala serbe në Kosovë dhe BeH ka kryer krime të ngjashme, gabime dhe mëkate të ngjashme. Dhe në fund të fundit, nga kjosjellje dhe nga kjo dhunë, kanë ardhur sulmet e NATO-s. Kështu që, kjo nuk mund të ndërlidhet në asnjë mënyrë më tej në kuptim që diçka të kompensohet në BeH, eventualisht atë që Serbia mund ta humbasë me zgjidhjen për Kosovën. Vetëm mund të lëshohemi në disa aventura të vështira dhe në skenarë shumë të paqartë. Shpresoj se do të ketë mençuri të mjaftueshme që të mos shkojmë në këtë drejtim”, tha Izetbegoviç në një intervistë për agjencinë e lajmeve Anadolu.
Kujtojmë se Bakir është djali i Presidentit të parë të Bosnjës dhe Hercegovinës së pavarur, Alija Izetbegviç. Ai shërbeu si president nga viti 2010 deri në vitin 2018, dhe njihet për qëndrimin pro shtetësisë së Kosovës, pavarësisht mungesës se autoritetit të shtetit boshnjak për të marrë vendim që ta njohë shtetësinë e saj. /tesheshi.com/
