Edhe në vitin 2015 nuk ka gjetur zbatim Ligji për personat e verbër, ndonëse ai është miratuar në Kuvendin e Kosovës në qershorin e vitit 2012 dhe është dashur të nis të zbatohet më 1 janar të 2013. Kjo është edhe kërkesa kryesore e kësaj kategorie e cila po injorohet nga institucionet e shtetit derisa po vazhdojnë të përballen me probleme të shumta.
Për këto dhe çështje të tjera, në një intervistë të dhënë për portalin tesheshi.com ka folur Bajramshahe Jetullahu, kryetare e Komitetit të Grave të Verbra të Kosovës.
Ajo ka treguar edhe pse ministri i Punës Arban Abrashi nuk ka pranuar të takohet me këtë kategori edhe pse disa herë kanë bërë kërkesë për një gjë të tillë.
Intervistoi: Blendi Gashi
Sa persona të verbër, apo me shikim të dobësuar jetojnë në Kosovë dhe me çfarë problemesh ballafaqohen kjo kategori?
Ekzistojnë mbi 2500 persona të verbër dhe kjo kategori ballafaqohet me mungesen e zbatimit të Ligjit për të verbër, ligj i cili është nënshkruar në vitin 2012, pikërisht gjatë mujit qershor i cili deri më tani nuk është jetësuar në praktikë.
A janë të inkuadruar në shoqërinë kosovare, sa për qind e tyre janë të shkolluar, punësuar?
Sa i përket punësimit mund të themi lirisht se mund të numërohen në gishta të një dore personat e verbër të cilët janë të punësuar. Ndërsa sa i përket shkollimit, fatmirësisht tani personat e verbër kanë të drejtë të shkollimit në universitete por pa mjete të përshtatshme për shkollim të tyre, sepse këta ballafaqohen me mungesë të literaturës në shkrim të alfabetit për të verbër.
Shoqëria civile ka filluar të vetëdijësohet dhe tash personat e verbër i pranojnë në shoqëri dhe nuk diskriminohen si më pare, tashmë personat e verbër në këtë aspekt janë të barabartë.
Gjatë vitit 2015 keni zhvilluar një takim me gratë deputete. Ato janë zotuar se do të ngrejnë zërin në institucione për personat e verbër. Sa kanë bërë një gjë të tillë dhe sa keni përkrahje institucionale në përgjithësi?
Më datë 25 gusht të viti 2015 kemi pasur një takim konsultativ me gratë deputete dhe ato asambleiste të Komunës së Prishtinës. Ato na kanë premtuar se do të ngrejnë zërin në bashkëpunim me stafin e komunitetit, por ende nuk ka lëvizje në këtë drejtim.
A keni infromacione pse nuk po zbatohet Ligji për Personat e Verbër dhe sa do të zvogëlonte zbatimi i këtij ligji problemet e personave të kësaj kategorie?
Ligji për personat e verbër i cili është nënshkruar nga vetë kompetentet ka hasur në vesh të shurdhët. Nëse ligji në fjalë siç pretendon Komiteti i Grave të Verbra të Kosovës (KGVK) të bind institucionet relevante që ai të zbatohet gjatë vitit 2016-të, problemet e të verbërve do t’i zvogëlonte jashtëzakonisht shumë.
Ju keni deklaruar se keni kërkuar takim me ministrin e Punës gjatë këtij viti por ai nuk ka pranuar të takohet me ju. Çfarë hapa do të ndërmerrni, do të protestoni (nëse po kur)?
Gjatë këtij viti kemi kërkuar në mënyrë intensive të takohemi me ministrin e punës Abrashi, ku i kemi dërguar disa herë shkresa përmes email-it dhe kemi telefonuar në ministry, por asnjëherë nuk ka pranuar të na takojë. Arsyetimi i tyre ishte se ministri është i zënë me punë të tjera, sikur ne nuk i takojm punës së tyre.
Cili është apeli juaj për institucionet qendrore?
Apeli i të verbërve në përgjithësi është zabatimi i Ligjit në fjalë, pasi me zbatimin e tij këta persona do të kishin një jetë krejt ndryshe nga ajo e sotmja.
/tesheshi.com/
