Edhe në Kosovë, Fiter Bajrami u fal me distancim social, por ndryshe nga Shqipëria ku faljet bëhen në shesh, aty faljet e Bajramave vijojnë në xhami, e kësaj here ka qenë “vetmia” e tyre pjesa e dhimbshme.
Por siç e potencoi Myftiu Tërnave, shëndeti është parësor edhe fetarisht.
“Agjërimi i sivjetëm është më i ndryshëm nga vitet e tjera e më e veçantë është edhe festa e Fitër Bajramit që po e përjetojmë sot për shkak të pandemisë që ka shkaktuat virusi COVID-19, i cili na ka privuar nga shumë aktivitete e organizime fetare.
Qe një kohë për shkak të pandemisë, respektivisht për shkak të rrezikut që paraqet ky virus, jemi detyruar që të jemi të izoluar në familjet tona, të pezullojmë faljet e organizuara në xhamitë tona, të heqim dorë nga manifestimet publike, ashtu siç kemi hequr dorë nga manifestimet e falja e namazit të Fiter Bajramit.
Të gjitha këto vendime jo të lehta janë marrë në të mirë të komunitetit tonë, në të mirë të shëndetit tonë, sepse këtë e kemi obligim e parim në fenë tonë“, tha njeriu numër një i muslimanëve në Kosovë. /tesheshi.com/
