Zv.ministri i MAPL-së, Bajram Gecaj e ka quajtur shkrimtarin Rexhep Qosja si person që ka fobi LDK-në. Ai ka shkruar në Facebook se Qosja po i fryn zjarrit edhe në Kosovë për një revolucion, që sipas Gecajt me veprime të tilla po bënë thirrje për një konflikt vëllavrasës në Kosovë.
Postimi i plotë i Gecacjt në Facebook:
LDK-fobisti Rexhep Qosja
Është jashtëzakonisht intriguese se si një akademik, tani e 26 vite, nuk mund të tejkaloi fobinë e tij ndaj LDK-së. Deri dje përkrahës deri në servilitet i PDK-së, sot kundërshton madje edhe ata, vetëm e vetëm pse këta të fundit kanë hyrë në një koalicion me LDK-në. Është mu ky akademik i cili i “fryu” zjarrit në “revolucionin e vonuar demokratik” në Shqipëri, e që atëherë rrezikoi edhe qenien e shtetit shqiptar.
Tani, përsëri po e bën të njëjtën, duke i fryrë zjarrit për edhe një “revolucion të vonuar demokratik” në Kosovë, e për ta dërguar edhe Kosovën drejt një konflikti vëllavrasës. Edhe pse u instalua një herë në mënyrë artificiale në skenën e atëhershme politike, duke u shndërruar kështu në një element përçarës në mes LDK-së dhe UÇK-së, megjithatë, nuk arriti të legjitimoi LBD-në e atëhershme në zgjedhjet pasuese, pasi që arriti të siguroi vetëm 0.4 % të votës popullore.
Për gjithsecilin intelektual të kthjellët, ky do të ishte mesazh shumë i qartë se politikën dhe çështjet nacionale duhet lënë të tjerëve. Por ai ende vazhdon të fantazojë se është “babai i kombit”, dhe se është populli dhe jo ai që ka gabuar. I themi këtij urrejtësi patologjik se fobinë e tij mund ta shëroj vetëm nëse mbyllet në kabinetin e tij dhe merret me atë për të cilën është trajnuar.
/tesheshi.com/
