Nga Blendi Gashi
Janë bërë më shumë se shtatë muaj që partitë opozitare kosovare VV, AAK dhe NISMA kanë lidhur një aleancë mes vete me qëllimin e vetëm rrëzimin e qeverisë Mustafa nga pushteti.
Por, pas kësaj kohe kanë dalë në pah krisjet e para mes opozitarëve që lehtë mund të çojnë në prishjen e tyre dhe njëkohësisht mund t’ia zgjasin jetën partive në koalicion qeverisës PDK-LDK.
Formimi i listës së përbashkët zgjedhore i proklamuar qysh muaj më parë, duket të jetë një “bjeshkë” e pa kapërcyeshme për opozitarët.
Konkretisht çështja kush duhet të jetë “bajraktari”, prijësi i listës zgjedhore, Albin Kurti i VV-së apo Ramush Haradinaj i AAK-së mund të hedh në lloç rezistenën disamujore të opozitës kosovare kundër pushtetit.
Se lista zgjedhore është një sherr i madh mes opozitarëve, e ka treguar vet sekretari i Lëvizjes Vetëvendosje, Dardan Molliqaj të hënën mbrëma në një emision televiziv.
Molliqaj ka thënë se në Kosovë duhet të bëhen ndryshime, por ai ka lënë të kuptohet se me AAK-në e Haradinajt nuk mund të bëhen ndryshimet që kërkohen.
“AAK nuk duhet të ma merr për keq, nuk mund të ecim tutje, sepse në Kosovë duhet të ndodhin ndryshime dhe duhet të ndodhin ndryshime përnjëmend”, ka thënë ai.
Sekretari i VV-së, duke folur për listën e përbashkët zgjedhore ka thënë se AAK ka refuzuar që pjesë e listës të jetë edhe shoqëria civile, derisa thotë se edhe personalisht është kundër formimit të një liste të përbashkët, por ka shtuar se do ta respektoj vendimin që do e marrë subjekti i tij.
“Kemi diskutuar por listën përbashkët nuk kam pa te AAK atë që është dashtë mu pa. Lista mu kriju në bazë të kritereve e jo pse i takon AAK dhe NISMA-s. Iu kam thënë për listë mund të jenë sondazhet koncepte, kush ka kontribuuar më shumë dhe në bazë të kësaj të përcaktohet fuqia në secilin prej neve. Lista e përbashkët duhet të ndërtohet mbi parime dhe kritere dhe jo mbi interesa politike. Nuk duhet të shkojmë më listë të përbashkët”, ka deklaruar Molliqaj.
AAK: Deklarimet e Molliqajt të pavërteta
Deklarimet e bëra nga sekretari i VV-së, i mohon në mënyrë kategorike partia e Ramush Haradinajt.
Zëdhënësi i AAK-së, Muharrem Nitaj, kë thënë për portalin mbarëkombëtarë tesheshi.com se nuk është e vërtetë se AAK, është kundër për një liste të përbashkët ku do të përfshiheshin edhe përfaqësues të shoqërisë civile, por është kundër që në një listë eventuale të përbashkët, ku nën siglën e përfshirjës së pjesëtarëve të shoqërisë civile, do të përfshiheshin disa njerëz që janë më partiak, se sa vetë anëtarët e partive.
“Është legjitime që zoti Molliqaj të jetë kundër një liste të përbashkët. Si Molliqaj, ka plot edhe në AAK, besoj edhe në Nisma edhe në VV.
Për hirë të informimit të drejt të opinionit publik, është diskutuar mundësia për një listë të përbashkët dhe ajo ka mbetur opcionale. Por deri në këtë moment, nuk ka asgjë konkrete, sepse nuk mund të ketë një vendim për kurrfar listash, pa u caktu data e zgjedhjeve”, ka thënë Nitaj, për tesheshi.com.
Zëdhënësi i AAK-së thotë se nuk mund ta di cili është qëndrimi i eksponentëve të VV-së, veç e veç, por e di që ka një gatishmëri të lidershipit të Vetëvendosje-s që të shqyrtohet seriozisht një mundësi e një liste të përbashkët.
Nitaj, thotë se edhe nëse ka ndryshuar disponimi për një listë të përbashkët nga VV, një gjë e tillë është legjitime.
“Është mirë që partitë opoztare janë bashkë në kundërshtimin e keqqeverisjes aktuale. Do t’ishte akoma më mirë sikur të kishte një koncenzus edhe për një listë të përbashkët, kur t’i vijë koha, por nëse kjo është e pamundur, atëherë shkojmë ndaras në zgjedhje, apo kush me kë të dojë. Kjo është demokracia. Qoftë me listë të përbashkët, qoftë ndaras, AAK, në listën e saj do të ketë edhe përfaqësues të shoqërisë civile”, thotë Nitaj.
Edhe shefja e Grupit Parlamentar të AAK-së, Donika Kadaj-Bujupi, në një intervistë dhënë përtesheshi.com se lista e përbashkët është opsionale por që ende nuk ka diçka konkrete në këtë drejtim.
“Ende nuk jemi dakordu sepse si subjekte politike kemi subjektivitetin tonë, kemi temat që lidhen me programet tona që paraprakisht duhet shqyrtohet parimet e përgjithshme, programet dhe të shohim se a do të mund të dalim me një listë të përbashkët. Deri më tani kemi avansuar por ende ka punë për të bërë”, ka thënë Kadaj-Bujupi.
Ndryshe, blloku opozitar i ndërtuar në vitin 2014-të ishte prishur pikërisht për shkak të posteve, mbetet të shihet nëse do të jenë pikërisht interesat partiake që do ta prishin edhe opozitën e bashkuar VV, AAK e NISMA. /tesheshi.com/
