Humbja me PSG ka qenë fatale për trajnerin e Bajernit të Mynihut, Karlo Ançeloti. Mediat njoftojnë se tashmë klubi bavarez dhe vetë italiani, kanë marrë vendimin për të përfunduar aventurën e përbashkët.
Edhe pse mbrëmjen e së enjtes do të ketë një mbledhje të gjatë mes drejtuesve të klubit dhe trajnerit, duket se gjithçka është përcaktuar.
Fillimi jo i mirë i kampionatit, humbja me PSG, si edhe “injorimi” që italiani u ka bërë senatorëve të ekipit, duke i lënë në stol, kanë bërë që “teli i siguresës” të shkëputet dhe Ançeloti t’i ketë të gjithë kundër.
Skuadra mendohet t’i lihet momentalisht në dorë Vili Sanjol, një ish-bavarezi që së fundmi ishte bërë pjesë e klubit.
Francezi ka luksin të trajnojë skuadrën që në fillim të sezonit, si edhe mundësinë për të treguar vlerat e tij, tek një klub i madh.
Nëse Sanjol do të bindë, Bajerni nuk do të ndryshojë trajner, nëse jo, do të shihen alternativa. Vetë tifozët e Bajernit, preferojnë Jurgen Klop për sezonin tjetër, pasi e konsiderojnë atë, ekspert të krijimit të frymës fituese në skuadër. /tesheshi.com/
