Largimi i trajnerit Ançeloti nuk i ka larguar problemet me rezultatin tek Bajerni i Mynihut. Bavarezët shpërdoruan një dopjo avantazh, duke u arritur dy herë nga berlinezët e Hertës, për t’ia ngrirë buzëqeshjen trajnerit provizor, Uilli Sanjol.
Futbollistët e Bajernit ruajtën kontrollin e topit, por me sa duket nuk kanë gjetur ende ekuilibrat në mesfushë e mbrojtje. Pjesa e parë u mbyll 1-0 në favor të Bajernit, pas një goli me kokë të mbrojtësit Humels.
Me fillimin e së dytës, Levandovski dyfishoi rezultatin, duke dhënë përshtypjen e një ndeshjeje që po mbyllej. Por një gol i shpejtë i Duda, e më pas, një tjetër gol i Kalu, treguan limitet e mbrojtjes së Bajernit.
Edhe pas dëmtimit të Riberi e hyrjes së Koman, pak ndryshoi në lojën e bavarezëve, të cilët nuk mundën të depërtojnë mbrojtjen e ngjeshur të Hertës.
Pas këtij barazimi, Bajern largohet edhe më shumë nga Borusia e Dordmundit, që me fitoren e së shtunës, shkëputet 5 pikë nga bavarezët. /tesheshi.com/
