Lajpcigu, një Lestër Siti i kampionatit gjerman, ka humbur sonte karshi Bajernit të Mynihut në “Allianz Arena”, në duelin e drejtpërdrejtë mes dy kryesuesve.
Bajerni dhe Lajpcigu ndanin deri sonte në mbrëmje vendin e parë dhe të dytë të Bundesligës me pikë të barabarta, por me bavarezët në krye për shkak të golavarazhit më të mirë.
Fitorja 3-0 i shkëput bavarezët me tre pikë, duke e mbyllur vitin si kryesues.
Në prani të 75.000 tifozëve, të dy skuadrat e kanë nisur furishëm, veçse kanë qenë miqtë ata që kanë patur rastin më të pastër për të kaluar në epërsi. Një top që ka parakaluar tërë portën e Neuer-it nuk ka arritur të preket e të dërgohet në rrjetë nga Poulsen.
Ky ka qenë momenti i kthesës për lojtarët e Bajernit, që shënojnë tre herë prej minutës së 17-të e deri në fund të pjesës së parë.
Fillimisht shënon Thiago Alcantara pasi topi kthehet nga shtylla, Xabi Alonso dyfishon rezultatin, e Lewandowski fikson rezultatin 3-0 me një 11-metërsh në minutën e 45-të. Lajpcigu kishte mbetur më herët me dhjetë lojtarë, pas daljes me të kuqe për një ndërhyrje të rëndë të Forsberg-ut.
Pjesa e dytë qe më tepër një administrim i lojës nga Bajerni, shoqëruar dhe me disa raste për gol.
Bavarezët kanë 39 pikë pas 16 javëve të Bundesligës; Lajpcigu i ndjek me 36 pikë. /tesheshi.com/
