Fitimi i Bundesligës është shumë pranë për Bajernin e Mynihut, por skuadra bavareze mund të fitojë dhe një trofe tjetër vendor kur të luajë në finalen e Kupës së Gjermanisë, apo, ndryshe, siç njihet, DFB Pokal, më 21 maj.
Në gjysmëfinalen e luajtur mbrëmë ndaj Verder Bremenit, bavarezët kanë fituar 2-0 në prani të 75.000 shikuesve në “Allianz Arena”.
Miqtë kanë patur rastet e tyre, pa arritur t’i konkretizojnë ato. I zakonshmi Müller shënoi nga një gol për çdo pjesë. Goli i parë u shënua në minutën e 30-të, e i dyti në të 71-tën, nga pika e bardhë e 11-metërshit.
Skuadra e dytë finaliste do të mësohet sonte, kur Herta e Berlinit të ndeshet me Borusian e Dortmundit.
Ballafaqimi i mundshëm mes Bajernit dhe Borusias do ta bënte të shumëpritur finalen e Kupës.
PSG-ja, e shpallur tashmë kampione e Francës, ka shkruar emrin në finalen e Kupës. Parizienët kanë
luajtur në gjysmëfinale në fushën e Lorientit, ku kanë fituar ngushtësisht 0-1. Goli është shënuar nga Ibrahimovic në minutën e 75-të.
Sosho dhe Olimpiku i Marsejës luajnë sonte gjysmëfinalen e dytë, prej nga do dalë dhe kundërshtari i PSG-së.
Finalja e Kupës së Francës do të luhet të shtunën e 21 majit.
PSG-ja ka mundësi ta bëjë të vetin këtë të shtunë dhe një trofe tjetër, teksa do të ndeshet me Lilën në finalen e Kupës së Ligës. /tesheshi.com/
