Kampionët e Gjermanisë, fituesit para dy javësh dhe të Superkupës së Gjermanisë, bavarezët e Bajernit të Mynihut, patën nderin të hapin Bundesligën për sezonin 2016-2017.
Dhe e kanë bërë këtë si jo më mirë, duke fituar tenistikisht ndaj Verder Bremenit. Rezultati final i takimit të mbrëmjes të së premtes ka qenë 6-0, me një dominim total të vendasve.
Të gjitha shifrat e ndeshjes flasin në favor të bavarezëve, që bëjnë një paraqitje brilante para 75.000 tifozëve në “Allianz Arena”.
Tre prej golave u shënuan nga polaku Lewandowski, i cili e tundi rrjetën kundërshtare në minutën e 13-të, të 46-të dhe të 77-të.
Serinë e golave e hapi shpejt Xabi Alonso, në minutën e 9-të, ndërkohë që do të shënonin dhe Lahm e Ribery.
Thomas Müller nuk qe mes golashënuesve, diçka e rrallë për të, por shërbeu gjithsesi me tre pasime për gol.
Carlo Ancelotti, tekniku italian që e drejton tani Bajernin, deklaroi pas ndeshjes: “E nisëm shumë fuqishëm, i shënuam herët golat, dhe e kontrolluam ndeshjen. Për të thënë të vërtetën, nuk kam bërë shumë ndryshime. Ky është një ekip shumë i fortë.”
Nga takimet e tjera të javës së parë të Bundeligës, që do të luhen këtë pasdite, veçohen Borusia e Dortmundit – Mainz dhe Borusia e Mynshegladbahut – Bajer Leverkusen. /tesheshi.com/
https://youtu.be/F6YhZ1bgDpw
