Futbolli gjerman e spanjoll paralajmërojnë nisjen e sezonit të ri me ndeshjet e superkupave respektive. Në Gjermani, Bajerni i Mynihut e ka bërë të tijin trofeun, kurse Barcelona do duhet të presë dhe takimin e dytë, edhe pse thuajse e ka të garantuar suksesin.
Finalja e Superkupës së Gjermanisë, midis Borusias së Dortmundit dhe Bajernit të Mynihut, u luajt në Dortmund, në “Signal Iduna Park”.
Siç ngjet rëndom në këtë stadium, ai ishte tërësisht i mbushur, por kjo nuk i pengoi aspak kampionët e Bajernit që të fitonin.
Borusia e Dortmundit do të kishte epërsi në kontrollin e lojës, diçka që nuk u shndërrua në rezultat pozitiv. Skuadra udhëtuese u tregua më e saktë në rastet që iu paraqitën, duke fituar 0-2. Golat u shënuan nga Vidal e Müller në minutën e 58-të dhe të 79-të. Ky ishte trofeu i parë i fituar nga Ancelotti, tekniku italian që do ta drejtojë Bajernin këtë sezon e më tutje.
Në radhët e Bajernit të Mynihut luajti gjatë gjithë lojës ish-kapiteni i Borusias së Dortmundit, Hummels, kurse Götze, i rikthyer në Dortmund, nuk pati të njëjtin fat, duke mos u aktivizuar për asnjë çast.
Në Spanjë, superkupa luhet me dy takime, me të parin të zhvilluar dje.
Pasi është mposhtur ditë më parë nga Reali i Madridit në Superkupën e Europës, Sevilja pësoi një tjetër humbje mbrëmë në shtëpinë e vet, e këtë herë nga Barcelona.
Sevilja – Barcelona do të përfundonte 0-2 për katalanasit, që vijojnë me paraqitjet e tyre të mira në prag
të sezonit.
Luis Suarez dhe Munir ishin realizuesit e golave, të shënuar në pjesën e dytë të lojës.
Rezultati i mbrëmshëm i jep mundësi Barcelonës ta presë me qetësi takimin e dytë, që do të luhet të mërkurën. Fitimi i këtij trofeu ngjan një punë e kryer për Barçën, duke përjashtuar ndonjë surprizë të madhe. /tesheshi.com/
