Mbrojtësi me origjinë shqiptare i Valencias, Shkodran Mustafi, me shumë mundësi mund ta lërë Spanjën në verën e ardhshme, në kërkim të një ekipi më me prestigj.
Ai gjendet në vitin e dytë te Valencia, pasi u transferua në gushtin e 2014-ës nga Sampdoria. Një lojtar i kombëtares gjermane, ai ka bërë paraqitje mjaft të mira me ekipin e spanjoll, e hera-herës edhe ka shënuar në portat kundërshtare.
Kontrata e Mustafit me Valencian përfundon në qershor të 2019-ës, por faqet sportive që merren me transferimet e lojtarëve e bëjnë të sigurt faktin se ai do të largohet në fund të këtij sezoni.
Dhe emrat e skuadrave që japin për destinacion të ardhshëm të tij janë pikërisht Bajerni i Mynihut apo Mançester Junajtedi.
Si ekipi gjerman dhe ai anglez kanë patur probleme në qendër të mbrojtjes, dhe një mbrojtës si Shkodran Mustafi do t’u bënte mjaft punë.
Të dy ekipet do të ndërrojnë trajner në fund të këtij sezoni, kështu që dhe transferimi i Mustafit do të varet shumë nga dëshirat e stafeve të reja drejtuese. /tesheshi.com/
