Pas një ndalese të shkurtër, kanë rinisur kampionatet e futbollit në ligat europiane.
Në Bundesligë, ndeshja hapëse e javës së dytë, e luajtur mbrëmjen e së premtes, ka qenë ajo mes Shalkes dhe Bajernit të Mynihut.
Vendasit kanë patur rastet e tyre, por pa mundur t’i konkretizojnë. Bavarezët janë treguar klinikë, duke goditur në momentin e duhur, në minutat e fundit të ndeshjes.
Ndeshja dukej të shkonte drejt një barazimi, kur Lewandowski shënoi në minutën e 81-të. Ishte goli i katërt i polakut ky në dy javë kampionat, ndërsa pati shënuar një tregolësh ndaj Verder Bremenit.
Goli i Kimmich-it në minutën e 92-të vulosi rezultatin 0-2 për miqtë, që duket se do të vijojnë ta dominojnë tërësisht futbollin gjerman.
Vijon po ashtu dominimi i Bajernit të Mynihut ndaj Shalkes, duke mos e provuar shijen e humbjes në 12 përballjet e fundit mes tyre.
Ndryshe Bajernit në Bundesligë, Paris Sent-Zhërmeni vijon të humbasë terren në kampionatin francez. Të pamposhtur për vite me radhë, kryeqytetasve kanë nisur t’u lëkunden pozitat.
Për PSG-në ka ardhur ndalesa e dytë në katër javë kampionat. Humbja ndaj Monakos dy javë më parë
është shoqëruar nga një barazim i papritur me Sent-Etjenin.
Kampionët e Francës kanë humbur shkëlqimin me largimin e Ibrahimovic-it, ashtu siç kanë humbur dhe vijueshmërinë pozitive.
Takimi mes PSG-së dhe Sent-Etjenit ka përfunduar 1-1. Të parët kanë shënuar vendasit, me një 11-metërsh të kthyer në gol nga Lucas Moura në minutën e 67-të. Miqtë kanë surprizuar në fund të ndeshjes, në minutën e 92-të, kur ka realizuar Beric.
Skuadra kryeqytetase pozicionohet në vend të tretë në kampionatin francez, por do të zbresë më poshtë pasi t’i luajnë dhe skuadrat e tjera ndeshjet e javës së katërt. /tesheshi.com/
