Bagdad: lirohen 16 punëtorët turq që ishin marrë peng në fillim të muajit

16 punëtorët turq që ishin rrëmbyer nga një grup i armatosur shiit në kryeqytetin e Irakut, Bagdad janë liruar, njoftoi kryeministri i Turqisë, Ahmet Davutoglu.

Përmes një postimi në Twitter, ai tha se ambasadori turk në Bagdad kishte pritur 16 punëtorët turq që ishin mbajtur peng për disa kohë në Bagdad dhe se ai vetë kishte folur me ta.

Në total, 18 punëtorë turq ishin rrëmbyer në fillim të muajit në periferi të Bagdadit. Dy prej tyre ishin liruar më herët.

Edhe presidenti Recep Tayyip Erdogan gjithashtu përgëzoi ambasadorin për punën e bërë dhe uroi punëtorët e liruar.

Të gjithë ata ishin punonjës të Nurol Holding, një firmë ndërtimi turke që punon aktualisht në disa projekte të infrastrukturës në kryeqytetin iraken. /tesheshi.com/