Kongresi i 40 në Budapest i UEFAS nuk e ka miratuar ditën e sotme amendamentin për ndryshim që do t’i mundësonte Kosovës pranimin në UEFA, mirëpo, kjo nuk e ka penguar Kosovën që të anëtarësohet në UEFA si një anëtare me të drejta të plota me efekt të menjëhershëm.
Presidenti i Federatës së Futbollit të Kosovës, Fadil Vokrri ka kërkuar nga 54 shtete anëtare UEFA-s që t’ia japin mundësin Kosovës të bëhet pjesë e UEFA-s. Ai u ka bërë apel të pranishmëve që të votojnë pro vendimit për pranim të Kosovës, pasi e meriton të jetë pjesë e saj.
Në Kongresin e mbledhur në Budapest të Hungarisë u shtrua pyetja: “A jeni dakord që Kosova të bëhet pjesë e UEFA-s me anëtarësim të menjëhershëm?”. Në votim kanë marrë pjesë 54 anëtarë, të cilët bëjnë pjesë në unionin e federatave të futbollit Europian. Në përfundim të votimit, Kosova mori 28 votat e nevojshme, ndërsa 24 ishin kundër dhe 2 të tjera u shpallën vota të pavlefshme.
Një aspekt vështirësues ka qenë neni 5 i statutit të UEFA-s, ku thuhet se anëtarët e organizatës që duan të jenë pjesë e UEFA-s, duhet të jenë anëtarë të OKB-së, por kjo është një çështje politike dhe aspak sportive.
Përfundimisht, aplikimi i Federatës së Kosovës është pranuar për në UEFA
“Ju dërgoj mirënjohjen në emër të lojtarëve të rinj në vendin tim, të cilët i kanë kushtuar jetën futbollit. Ky është një moment historik dhe ju premtoj se do të mbroj vlerat e futbollit në një rajon që deri para pak kohësh ka qenë i përfshirë në luftë. Nëpërmjet futbollit do të kemi mundësinë të afrojmë njerëzit bashkë në stadium dhe përreth tij. Ky është misioni ynë në të ardhmen si anëtar i 55 në UEFA”, – tha Fadil Vokrri në fjalën e tij falenderuese.
Më herët, vetë presidenti i Federatës Shqiptare të Futbollit, Armando Duka është shprehur se Kosova është bërë realitet, ndaj UEFA, e cila është një organizatë sportive, duhet të shikojë vetëm futbollin dhe jo axhendën politike.
“Në Kosovë ka lojtarë që luajnë me ekipe kombëtare dhe nëse do t’ju thonim atyre që nuk lejohet të luajnë, do t’ju hiqnim të drejtën për të luajtur në arenën ndërkombëtare. Pse duhet ta pranojmë Kosovën si anëtar? Sepse të gjitha federatat e tjera të sporteve në Kosovë janë pranuar në federatat e tjera kombëtare, përjashtuar futbollin. Edhe ne në Shqipëri kemi disa lojtarë me origjinë nga Kosova. Duhet të shikojmë të ardhmen që mund t’i ndalojmë anëtarëve të Kosovës që të luajnë, ndaj duhet të mendojmë për futbollin dhe vetëm për futbollin”, – tha Duka.
Vetë Dejan Savićević, presidenti i Federatës së Futbollit në Malin e Zi, në kuadër të mosdhënies së dritës jeshile të Kosovës në UEFA shtroi pyetjen se çfarë përdorimi ka statuti, nëse Kosova refuzohet nga UEFA sot. “Pas një vendimi të tillë, a do të thotë se Statuti është më pak i rëndësishëm se Kongresi? Të gjithë e dimë se çfarë na është kërkuar për të qenë anëtarë të UEFA-s. Sot supremacinë mbi Statutin e tregon Kongresi, ndaj doja të më shpjegonit këtë situatë”, – tha Dejan Savićević.
Në këtë situatë, nuk kishte si të mungonte edhe qëndrimi refuzues i presidentit të Federatës serbe të Futbollit, Tomislav Karaxhixh, i cili ka kërkuar nga UEFA që të mos e pranojë FFK-në si anëtare të saj.
“Jemi kundër që Kosova të pranohet në UEFA, pasi ky është shtet i vetëshpallur dhe nuk i plotëson kushtet e pranimit. Politika duhet të qëndrojë larg futbollit”, tha Karxhixh. Mirëpo, thirrja e tij nuk e ndaloi Kosovën që të shënonte edhe një tjetër moment historik, siç është ai i pranimit në UEFA./tesheshi.com/
