Bekim Jashari edhe zyrtarisht ka marrë detyrën e kryetarit të Skënderajt. Djali i heroit të kombit Hamëz Jashari, për katër vjet do ta udhëheq këtë komunë të Drenicës, e cila që nga paslufta është drejtuar nga Partia Demokratike e Kosovës.
Pas dhënies së betimit kryetarit Jashari iu dhurua plisi i bardhë, simbol tradicional kombëtar.
Ai tha se sot është dita kur do të fillojë qeverisja e bazuar në llogaridhënie dhe transparencë.
Jashari tha se jo rastësisht në fushatë nuk ka premtuar asgjë përveç transparencës e llogaridhënies, pasi sipas tij, kjo do të sjellë më shumë investime në arsim, shëndetësi, sport e në të gjitha fushat.
“Nuk do të lejoj që në qeverisjen time të shkelet ligji”, premtoi ai.
Në ceremoninë e betimit prezent ishte edhe motra e tij Besarta Jashari e vetmja e mbijetuar gjatë betejës së 5,6 dhe 7 marsit të vitit 1998 ku ranë heroikisht Adem dhe Hamëz Jashari dhe 20 anëtarë të kësaj familje legjendare. /tesheshi.com/
