Reali i Madridit u përball mbrëmë me modestët e Kultural Leonesës në të dytin takim mes tyre për Kupën e Mbretit.
Niveli i kundërshtarit u dha mundësi vendasve që të luanin me një formacion eksperimental, ku nuk munguan dhe të veçantat.
Dhe një e veçantë e tillë ishte hyrja në lojë e të riut Enzo Zidane, i biri i të famshmit Zinedine Zidane, tashmë trajner i Realit e dikur lojtar i tij.
Enzo la shenjën e vet në fitoren 6-1, duke shënuar në minutën e 63-të, në debutimin zyrtar me skuadrën
“galaktike”.
“Të debutosh me Realin e Madridit dhe të shënosh një gol është gjithmonë një ëndërr. Dhe unë jam shumë i lumtur që kjo ndodhi në ‘Bernabeu’ dhe përfundoi me fitore,” u deklaroi Enzo Zidane gazetarëve pas ndeshjes.
“Jam krenar për Enzo-n si baba dhe si trajner,” do të shprehej Zinedine Zidane. /tesheshi.com/
