Ndërhyrja e shpejtë e policisë ka shmangur një krim brenda familjes, ku babai me një thikë ka sulmuar djalin për ta vrarë.
Ngjarja ka ndodhur në lagjen “Karbunarë e Madhe” në Lushnje, ku policia është njoftuar për një konflikt në familje.
Menjëherë në vendngjarje kanë shkuar shërbimet e policisë të cilët bënë të mundur shuarjen e konfliktit dhe parandalimin e një ngjarje të rëndë kriminale.
“Specialistët për Hetimin e Krimeve në Komisariatin e Policisë Lushnje, arrestuan në flagrancë shtetasin: Dervish Mezini, 74 vjeç, banues në lagjen “Karbunarë e Madhe” Lushnje”, njofton policia.
Arrestimi i këtij shtetasi u bë pasi në lagjen “Karbunarë e Madhe” në banesë, ka ushtruar dhunë fizike dhe psikologjike dhe ka kanosur me një mjet prerës (thikë), djalin e tij, shtetasin A.M, 45 vjeç.
Gjatë kontrollit të ushtruar në banesë iu gjet dhe iu sekuestrua në cilësinë e provës materiale një armë zjarri tip pistoletë model 54, të cilën e mbante pa leje.
Materialet i kaluan Prokurorisë pranë Gjykatës së Shkallës së Parë Lushnje për veprat penale “Dhunë në familje” dhe “Prodhimi dhe mbajtja pa leje e armëve dhe municioneve luftarake” parashikuar nga Nenet 130/a/4 dhe 278 të Kodit Penal. /tesheshi.com/
