Duhej të ishte njeriu me përjetimin emocional e njerëzor më të mirë në botë, por Ryan Giggs, i sapoemëruar trajneri i kombëtares së Uellsit, ka një “armik” të madh brenda familjes, pikërisht babanë e tij. Është pikërisht i ati që në një intervistë dhënë për “The Sun”, ka deklaruar se i vjen turp për djalin e tij.
E në fakt, babai i Giggs, Danny Wilson, i referohet një marrëdhënieje që ish-mesfushori i Manchester United ka patur me gruan e vëllait të tij, marrëdhënie që përvec “budallallëkut” të momentit, ka zgjatur në kohë.
“Duhej të isha babai më i lumtur në botë, por unë sot kam turp prej djalit tim. Nuk arrij as t’i përmend emrin për atë që ka bërë. Gjithë jetën është kujdesur se si do të dilte në televizor, si shkonte te hoteli i tij luksoz në Manchester, e për asgjë tjetër. Sa herë e shoh në televizor, e fik menjëherë. E gjithë familja bën kështu” – është shprehur babai i 44-vjeëarit.
Edhe pse ndjen keqardhje që flet në këtë mënyrë për djalin e tij, 62-vjeçari Wilson, e ka bërë “hasha” fëmijën e tij të parë, që sot është ndër njerëzit më të famshëm në Uells.
“Më vjen të qaj sa herë flas për këtë çështje. Ai ishte djali i madh e duhej ta mbronte vëllanë e tij, jo ta godiste poshtë brezit. Për më tepër në mënyrën më të turpshme të mundshme. Edhe kurrë nuk e pati kurajon t’i kërkonte falje. Ndaj asnjëri prej nesh, nuk do ta shohë me sy” – është zbrazur babai i Ryan Giggs, që me sa duket, as do t’ia dijë që i biri i famshëm, është vënë në një provë, nga e cila mund të hyjë në histori edhe si trajner, apo mund të mbetet edhe në periferi të saj.
Për Danny Wilson, me sa duket, Ryan duhej të hynte së pari, në zemrat e familjes, e më pas, në historinë e futbollit. /tesheshi.com/
