Nga Ylli Pata
Shumë njerëz, kryesisht ish-oficerë apo mekanikë pas viteve `90-të rritën mjekrat, vunë një kapele në kokë dhe quajtën “baballarë” teqesh.
Por Spartak Braho, “njeriu i një mijë mistereve”, edhe pse origjinën e ka nga Skrapari ku ka shumë teqe, ndajshtimin “baba” i ka mbetur për arsye të tjera.
Dy liderët e së majtës, Fatos Nanon dhe Ilir Metën, Taku (siç i thërrasin të gjithë) i ka trajtuar me kujdes dhe ka luftuar gjithë këto vite herë me njërin e më pas me tjetrin që t`u largojë telashet nga vetja.
Deputeti që ka qenë gjykatës, por që në fillim është diplomuar për gazetari, e ka nisur karrierën në vitin 1993, duke qenë avokati- këshilltar i Fatos Nanos në kohën që ai u burgos në 30 korrikun e atij viti.
Braho ishte mjeshtri që siguroi provat nga Italia të cilat rrëzonin e akuzat e Berishës. Dhe normalisht, shpërblimi erdhi nga shefi i tij sapo doli nga burgu: u bë deputet dhe drejtues i Komisionit të Ligjeve në vitin 1997. Por nuk kaluan as 5 vjet dhe Nano tha frazën e famshme në Durrës “Mua më pëlqen rakia e Skraparit, por jo Spartak Braho”.
U duk pa lidhje, por tashmë Taku kishte braktisur shefin e vjetër dhe qe lidhur me djalin e ri që e kishte edhe nga ana e vet. Nga 2002 iu bashkua Ilir Metës edhe pse nuk u angazhua ngushtë në strukturat e LSI-së.
Mbi 7 vjet qëndroi në “gjumë letargjik” në një dimër në karrierën e vet, për t`u zgjuar atëherë kur “djali” i tij kishte shumë nevojë, pikërisht në kohën e videos Meta-Prifti.
Me një çantë të zezë në dorë brodhi studio më studio duke thënë e shantazhuar se do të nxjerrë video e dokumente komprometuese ndaj akuzatorëve të kreut të LSI-së.
Normalisht, ishin pjesë e taktikës së atij që Ilir Meta e quajti “Prokuror i përhershëm”, ku thonte që kërkon vetëm ca minuta që të shfaqte “videot e tmerrshme” që nuk u shfaqen kurrë.
Në vitin 2012, Spartak Braho bëhet “kumbara” e bashkimit Rama-Meta, dhe me një gjest simbolik ndaj këtij bashkimi zgjidhet në listat e PS-së duke qenë anëtar të LSI-së.
Emërohet në krye të komisionit të Sigurisë Kombëare, ku kthehet në një nga personazhet kryesore të Kuvendit.
Në kohën kur Meta sërish është në vështirësi në çështjen ‘Doshi’, “baba Taku”, nis aktivitetin e tij si avokat por edhe njeri i “njëmijë mistereve dhe intrigave”.
“Memecit i erdhi goja”, tha Braho në një mbledhje komisioni për Durim Bamin, duke irrituar Gent Strazimirin që ia ktheu: “Na lodhët kokën me këto batuta filmash me sigurim shteti”.
Aq shumë u aktivizua në çështjen ‘Doshi’ sa u akuzua si një njeriu që ka manipuluar çështjen dhe i përmendën një udhëtim në Gjermani, ku herë u mbrojt se kishte nënën sëmure e herë për ndeshjen, por gjërat duket se qëllimisht u ndërlikuan ashtu.
Letra e djeshme drejtuar të gjithë krerëve të shtetit ku i bën apel të ndërhyjnë se po i bëhet komplot Ilir Metës prej Tom Doshit dhe Dritan Priftit – madje me shumë se Metës, vetë Shqipërisë – e kthen Takun, edhe pse në moshë të madhe (64 vjeç) sërish në rolin e babait për të mbrojtur “birin” e vet politik…./tesheshi.com/
