Pas takimeve të mbrëmshme me kryetarin e shtetit Gjorgje Ivanov, kryeparlamentarin Trajko Veljanovski dhe me liderët e VMRO-DPMNE-së dhe LSDM-së, Nikolla Gruevski dhe Zoran Zaev, përfaqësuesi special i Gjermanisë për Maqedoninë, Johan Hajndëll të premten ka realizuar takim edhe me liderët BDI- së dhe PDSH-së, Ali Ahmeti dhe Menduh Thaçi.
Si dje ashtu edhe sot, Hajndëll nuk u paraqit para mediave, por në njoftimin e ambasadës gjermane ka përshëndetur vendimin për shtyerjen e zgjedhjeve, vendim ky, siç thuhet në njoftim “ do të jep mundësi partive të përmirësojnë ngjarjet shqetësuese të muajit të kaluar dhe të kthejnë vendin në rrugën euroatlantike”.
Po ashtu, Berlini kërkon që sa më shpejt që është e mundur të tërhiqet vendimi i presidentit Ivanov për amnisti ndaj politikanëve të inkriminuar të pushtetit.
Kryetari i Bashkimit Demokratik për Integrim, Ali Ahmeti ka falënderuar homologun gjerman për vizitën, duke e njoftuar për zhvillimet e fundit në vend, me ç’rast edhe përshëndeti vendimin e Gjykatës Kushtetuese pas iniciativës së BDI-së që mundësoi rikthimin e Parlamentit si parakusht elementar për zgjidhjen e mëtutjeshme të krizës politike në vend.
“E njoftova homologun gjerman se me iniciativën tonë është rrikthyer Kuvendi, më pas anuluam zgjedhjet në afat të pacaktuar, njëkohësisht krijuam mundësi ligjore për tërheqje të faljes së Ivanovit, siguruam garanca për vazhdimin e punës së prokurorisë speciale si dhe mbrenda vetëm një dite miratuam disa ligje të domosdoshme reformuese që nevojiten për punën e Komisionit Shtetëror Zgjedhor”, ka thënë Ahmeti.
“Ahmeti gjithashtu ngriti nevojën për rikthim të agjendës së zgjidhjes së çështjes së emrit dhe ftoi ambasadorin Hajndëll dhe qeverinë gjermane që të fokusojnë energjinë në këtë drejtim pasi që të gjitha çështjet e këtij vendi burojnë nga ky problem”, thuhet më tutje në njoftimin e BDI-së.
Nga ana tjetër, kryetari i Partisë Demokratike Shqiptare, Menduh Thaçi pas takimit, nëpërmjet një njoftimi zyrtar ka theksuar se shkaktarët e krizës VMRO-BDI vazhdojnë me veprimet e tyre të njëanshme dhe të papërgjegjshme për çështjet të cilat ishin pjesë e bisedimeve dhe për të cilat duheshte të arrihet konsensus në mes të katër partive më të mëdha politike në vend, me ndërmjetësimin e përfaqësuesve të SHBA dhe BE-së. /tesheshi.com/
