Kohëzgjatja e madhe e procedurave, rregullat e ashpra për ribashkimin familjar, si dhe një shumë e konsiderueshme që u jepet të larguarve vullnetarisht, i kanë nxitur shumë azilkërkues ta lënë Suedinë.
Një numër rekord prej 4.542 azilkërkuesish i kanë tërhequr aplikimet e tyre dhe janë larguar në tetë muajt e parë të këtij viti.
“Po marrim sinjale se azilkërkuesit janë duke u lodhur nga koha e gjatë e procedurave, e se gjërat nuk kanë shkuar në Suedi ashtu siç ata kanë shpresuar,” është shprehur Kristina Ränner, një eksperte e Agjencisë së Migracionit.
Suedia ka qenë një prej vendmbërritjeve më të parapëlqyera në Europë për emigrantët, me numrin e aplikimeve për azil të dyfishuar mes viteve 2014 dhe 2015.
Përqindja e lartë e mundësisë për pranim të kërkesës për azil, e bashkëshoqëruar me një asistencë sociale të konsiderueshme, si dhe fakti që popullsia suedeze ishte pak a shumë mikëpritëse, e bënë vendin tepër tërheqës për njerëzit që iknin nga lufta dhe persekutimi. Ndërsa 55 për qind e kërkesave u pranuan një viti më parë, Suedia u bë vendi i dytë në Europë për numrin e refugjatëve në të për frymë.
Rregullat e ashpra të vendosura në fillim të këtij viti, në një përpjekje për t’i shkurajuar të ardhurit, një dimër i ftohtë e i gjatë, qëndrimi në hapësira të sajuara, kanë qenë disa prej arsyeve të largimit të azilkërkuesve.
Për të shtuar faktin që vetëm 500 prej 160.000 të ardhurve kanë mundur të gjejnë punë, si dhe shtimin e qëndrimit jomiqësor të popullatës suedeze. Si rezultat i ndryshimit të rregullave, Agjencia e Migracionit parashikon vetëm 60.000 kërkesa për azil gjatë gjithë vitit 2016.
Skema e dhënies së një shume së konsiderueshme për individët dhe familjet që largohen vullnetarisht e ka nxitur më tej dukurinë e re të tërheqjes së kërkesave për azil dhe të largimit nga Suedia. /tesheshi.com/
