Drejtori i Përgjithshëm i Policisë së Shtetit, Haki Çako, ka firmosur një urdhër që duhet të zbatohet në të gjitha pikat e kalimit kufitar në lidhje me kalimin e qytetarëve shqiptarë në vendet e zonës Schengen.
Urdhëri synon forcimin e masave me qëllim uljen e numrit të qytetarëve shqiptarë që shkojnë në vendet e BE për të kërkuar azil apo për të thyer rregullat e përcaktuara në lëvizjen e lirë.
Burime nga Policia e Shtetit bëjnë të ditur se në urdhëresën e firmosur nga Haki Çako përcaktohen 14 rekomandime, mbi të cilat uniformat blu që shërbejnë në Pikat e Kalimit Kufitar duhet të bazojnë punën e tyre në raport me kontrollin e dokumenteve.
Urdhëri është firmosur në datën 1 gusht 2017, ndërsa parashikon forcimin e masave të kontrollit në Pikat e Kalimit Kufitar, veçanërisht ndaj shtetasve që nuk plotësojnë kushtet e udhëtimit që parashikohen në marrëveshjen për lëvizjen e lirë.
“Të forcohen masat e kontrollit ndaj qytetarëve që nuk plotësojnë kushtet e udhëtimit për hyrjen dhe qëndrimin në vendet Shengen / BE-së duke kryer verifikime dhe intervista të detajuara si: adresën e saktë të akomodimit në vendin e destinacionit ku do shkojë; ftesa e pritësit në vendin e destinacionit (të përmbajë kontaktet e pritësit); biletë rezervimi për kthimin si dhe mjetet financiare për mbulimin e shpenzimeve për kohën e qëndrimit”, thuhet në urdhërin e Drejtorit të Policisë së Shtetit.
Ndërkohë parashikohet që kontrolle të ushtrohen edhe ndaj agjensive të udhëtimit, përsa i takon rasteve të zbatimit të rregullave mbi lëvizjen e lirë.
Duket se urdhëri ka të bëjë me shqetësimet e shprehura nga vende të BE-së, veçanërisht Franca, shtet në të cilin ka një rritje të kërkesave për azil nga qytetarët shqiptarë. /tesheshi.com/
