Masat e marra nga autoritetet shqiptare për të parandaluar fluksin e azilkërkuesve në zonën Shengen po monitorohen nga shtetet europiane. Kështu raportohet se oficerë të kontaktit nga Italia, Franca dhe Britania e Madhe janë angazhuar pranë pikave tëkalimit kufitar duke parë nga afër jo vetëm masat në letër, por edhe zbatimin e tyre në praktikë.
Burime nga policia e shtetit bëjnë të ditur se 3 oficerët, që i përkasin migracionit në vendet e tyre, po monitorojnë pikat e kalimit kufitar të Shqipërisë, mes tyre edhe aeroportin e Rinasit.
Të tre vendet gjatë muajve të fundit kanë ngritur alarmin mbi numrin e lartë të shtetasve shqiptarë që kërkojnë azil në vendet e tyre, apo që përpiqen që në kundërshtim me rregullat e lëvizjes së lirë të qëndrojnë jo vetëm në zonën Shengen. Një rast i tillë është Britania e Madhe, ku në ishull prej kohësh raportohet për shqiptarë që tentojnë të hyjnë apo kanë hyrë në kundërshtim me ligjet. Një pjesë e tyre janë arrestuar dhe deportuar, por shumë të tjerë kanë mundur të shpëtojnë.
Franca po kështu është një nga vendet e prekura, ku disa qindar shqiptarë janë vendosur në kampe dhe janë në pritje të përgjigjes për azil. Pak muaj më parë ministri i Brendshëm francez thirri në një takim kreun e diplomacisë shqiptare, Ditmir Bushati, dhe ministrin e ri të Brendshëm, Fatmir Xhafaj, të cilëve i shprehu shqetësimin mbi nivelet e larta të emigrantëve të paligjshëm.
Italia po kështu vuan situate të ngjashme, madje në shtetin fqinj të mitur (nën 18 vjeç) duke shfrytëzuar paketat turistike hyjnë në këtë vend dhe deklarohen pa përkrahje, duke detyruar autoritetet ti marrin në kujdestari.
Për të gjitha këto raste, të tre vendet duket se kanë angazhuar oficerë të migracionit për të monitoruar masat dhe për të parë zbatimin e detyrimeve që rrjedhin nga marrëveshja e lëvizjes së lirë.
Burime nga policia bëjnë të ditur se veçanërisht në pikat e kalimit kufitar është shtuar kontrolli ndaj mjeteve të identifikimit, pasi ka rezultuar se shtetas shqiptarë ose përdorin dokumente false, ose të pajisura me viza pune false.
Gjatë muajit gusht rreth 170 shtetas shqiptarë nuk u lejuan të dalin nga territor shqiptar, pasi nuk plotësonin kushtet e lëvizjes së lirë, ndërsa disa qindar të tjerë janë deportuar nga Franca, Holanda, Gjermania dhe vendet skandinave. /tesheshi.com/
