Menjëherë pas shpalljes vende të sigurta të origjinës së shteteve të tyre, azilkërkuesit nga Ballkani do të përballen edhe me ndalimin e udhëtimit drejt Gjermanisë, për shkak të druajtjes se ata mund të përsërisin kërkesën për azil.
Në mes të një debati të ashpër që ka nisur në Gjermani për të frenuar fluksin e azilkërkuesve nga Ballkani, tashmë ka lindur edhe ideja e ndalimit të udhëtimit për 94 mijë azilkërkues, nga shtetet ballkanike.
Mjaft prej tyre kanë precedentin që edhe pasi janë kthyer një herë, kanë tentuar sërish të aplikojnë për azil në Gjermani, e kjo ka rritur koston edhe për shtetin gjerman.
Portali “Die Welt” i referohet shefit të Autoritetit të mbikëqyrjes dhe kujdesit të emigrantëve, Manfred Schmidt, sipas të cilit situata është një krizë e vërtetë për shkak jo vetëm të numrit të madh të azilkërkuesve, por edhe atyre që rikthehen nga katër herë për të aplikuar.
Lajmet një herë të mira e një herë të këqija për azilkërkuesit në Gjermani vijnë ditë pas dite, e reflektojnë debatin e fortë në politikën dhe shoqërinë gjermane. Një ditë më parë, ishte lajmi i mirë që socialdemokratët propozojnë kontrata pune për azilkërkuesit nga Ballkani Perëndimor. /tesheshi.com/
