Një deklaratë e Ministrisë azere të Mbrojtjes ka bërë të njohur se Azerbajxhani i ndëpret në mënyrë të njëanshme luftimet me forcat armene, “Azerbajxhani, duke treguar vullnet të mirë, ka vendosur t’i ndërpresë luftimet në mënyrë të njëanshme.”
Por është paralajmëruar gjithashtu se Azerbajxhani do t’i çlirojë të gjitha territoret e pushtuara nëse forcat armene nuk i ndalojnë provokimet.
Pala armene e ka mohur të ketë një armëpushim, pasi, sipas saj, luftimet vazhdojnë ende. Zëdhënësi i presidencës separatiste në Karabak, të mbështetur nga Armenia, i tha agjencisë së lajmeve AFP se luftimet nuk ishin ndalur për asnjë çast në vijën e frontit.
“Luftime të ashpra po zhvillohen në pjesët verilindore dhe juglindore të vijës së frontit të Karabakut,” deklaroi David Babayan.
Sekretari i shtypit i Ministrisë së Mbrojtjes së Armenisë do të shprehte të njëjtën gjë, “Kjo deklaratë nuk nënkupton ndërprerjen e aksionit ushtarak.”
Të dyja palët akuzojnë njëra-tjetrën për rinisjen e konfliktit në rajonin e trazuar të Nagorni-Karabakut. Azerbajxhani deklaroi se forcat e tij të armatosura po reagonin ndaj sulmeve nga pala armene. Përndryshe, armenët pretendojnë se trupat azerbajxhanase nisën një ofensivë një ditë më parë. /tesheshi.com/
