Ministri i Mbrojtjes i Azerbajxhanit, Zakir Hasanov, urdhëroi njësitë ushtarake të jenë të gatshme për të shtypur menjëherë të gjitha provokimet në kufirin me Armeninë dhe në Karabak, njoftoi shërbimi për marrëdhënie me mediat i këtij departamenti, transmeton TASS.
“Ministria analizoi në detaje gatishmërinë luftarake dhe situatën aktuale në kufirin shtetëror Azerbajxhano-Armen, si dhe në zonën ekonomike të Karabakut, ku është vendosur përkohësisht kontingjenti paqeruajtës rus, dhe urdhëroi ushtrinë të jetë gati për veprime vendimtare në shtypjen e të gjitha provokimeve të mundshme të armikut”, thuhet në deklaratë.
Ministria e Mbrojtjes njoftoi më herët se pozicionet e ushtrisë Azerbajxhan në kufirin mes dy vendeve janë granatuar nga territori i Armenisë. Siç raportohet, sulmi u zmbraps nga një “përgjigje adekuate”, sipas TASS.
Ndërprerja e armiqësive
Konfliktet për Nagorno-Karabakh u përshkallëzuan më 27 shtator 2020.
Më 9 nëntor të po këtij viti, presidenti rus Vladimir Putin, presidenti i Azerbajxhanit Ilham Aliyev dhe kryeministri armen Nikol Pashinyan nënshkruan një deklaratë të përbashkët që mundëson ndërprerjen e armiqësive në zonën e konfliktit.
Ushtritë e Azerbajxhanit dhe Armenisë mbetën në pozicionet e tyre, një numër rajonesh janë nën kontrollin e Baku-së, ndërsa paqeruajtësit rusë janë vendosur përgjatë vijës së kontaktit dhe në korridorin e Laçinit, sipas agjencisë ruse TASS. /tesheshi.com/
