Në fund të një raundi të katërt bisedimesh në Gjenevë, palët ndërluftuese në Siri janë pajtuar për negociata të tjera, të ardhshme.
I dërguari i OKB-së për Sirinë, Staffan de Mistura, e bëri të qartë se do t’i ftonte gjatë këtij muaji negociatorët e qeverisë dhe të opozitës siriane për një raund tjetër bisedimesh.
“Ne kemi një axhendë të qartë përpara,” tha ai dje në mbarim të bisedimeve të kësaj jave.
Negociatat e tanishme në Gjenevë, të parat që nga prilli i 2016-s, synojnë t’i japin fund konfliktit tashmë gjashtëvjeçar në Siri.
“Eshtë tani e qartë për çdokënd se jemi këtu për të zbatuar rezolutën 2254 të Këshillit të Sigurimit, dhe kjo është jashtë çdo diskutimi,” ka deklaruar De Mistura.
Një rezolutë kjo e miratuar në vitin 2015, e që vë bazat për një tranzicion politik, ku parashikohen dhe zgjedhjet e mbikëqyrura nga OKB-ja brenda 18 muajsh.
Negociatat e Gjenevës pasojnë ato të Astananë, në Kazakistan, të ndërmjetësuara nga Turqia e Rusia. /tesheshi.com/
