Nga: Ylli Pata
Nuk kaloi as dy ditë, dhe me të ardhur Lulzim Basha nga vizita zyrtare në Shtetet e Bashkuara të Amerikës, Partia Demokratike e dha “OK” e vet për reformën në drejtësi.
Komisioni i Posaçëm Parlamentar ka kaluar dy nga pjesët më të rëndësishme të saj në mbledhjen e së martës.
Siç e kishte parashikuar tesheshi.com, vizita e Bashës kishte të bënte pikërisht me dhënien e miratimit në Uashington jo thjesht për Byronë e Hetimit apo draftin e reformës, por për operacionin e madh të spastrimit të politikës që pritet të nisë, e që u paralajmërua nga ambasadori i SHBA-ve në Tiranë, Donald Lu.
I gjithë ky aksion duket se jo vetëm ka një koordinim, por edhe një fazë të përcaktuar kohore dhe programatike.
Kryeministri Edi Rama po përgatitet që në mesin e javës së dytë të prillit të udhëtojë për në Uashington, i ftuar nga Shtëpia e Bardhë për një vizitë zyrtare në Shtetet e Bashkuara. Nga burime qeveritare mësohet se në qendër të axhendës së Ramës është takimi dhe bisedimet zyrtare me zëvendëspresidentin amerikan Joe Biden, ndërkohë që pritet edhe audiencë nga presidenti Barack Obama.
Por takimi me numrin dy të Shtëpisë së Bardhë është i rëndësishëm, pasi në të do të jenë të pranishëm edhe drejtori i Byrosë Federale të Hetimit të SHBA-ve, James B. Comey, si edhe përfaqësues nga Departamenti i Drejtësisë së SHBA-ve.
Sipas të gjitha gjasave, në këtë takim do të flitet për nisjen e operacionit të spastrimit të politikës, i cili do të jetë sipas aksiomës “shpejtësi dhe durim”. Shpejtësi për të mos lënë që të prishen provat, duke vepruar menjëherë, ndërkohë durim me hetimet që kërkojnë zbardhje dhe plotësim. Por siç mësohet prej ardhjes në Tiranë të prokurorit amerikan Gjon Juncaj, ka ecur përpara mbledhja e dosjeve dhe plotësimi i fakteve për zyrtarët e korruptuar.
Për këtë argument, shtysa vjen edhe nga mosdekretimi e më pas largimi nga Nishani e Llalla i pesë prokurorëve të përgatitur në Shtetet e Bashkuara të Amerikës një vit më parë.
Nga sa bëhet e ditur, ky grup i cili u mënjanua do të jetë bërthama e Byrosë Kombëtare të Hetimit, që pritet të miratohet javën e ardhshme në Kuvend.
Ndërkaq ardhja e Edi Ramës në Tiranë pritet të të inagurojë operacionin e madh, që, siç e tha Donald Lu
dje në Tiranë, do të ketë si përfundim arrestimin e Al Kapones.
Por, vërtet, kush është identikiti shqiptar i Al Kapones? /tesheshi.com/
