Akuzat për lidhje me bandat e narkotrafikut, drejtuar ministrit të Brendshëm, Saimir Tahiri ishin tema kryesore e fjalimit të mbajtur nga kreu i PD-së, Lulzim Basha në mbledhjen e grupit parlamentar. Basha ka vijuar me të njëjtat tone, ndërsa ka akuzuar Tahirin për kumbar të narkotrafikut në jug të vendit, dhe se ai po e shndërron Shqipërinë në Kolumbi.
Më pas, fokusi ka kaluar tek varfëria, e cila si tha Basha, ka mbërthyer fort shqiptarët për shkak të korrupsionit të qeverisjes.
“Rama-Meta shtrënguan rripin e shqiptarëve sepse paratë që duhet të shkonin tek ata shkuan në xhepat e oligarkëve. Në aktin normativ është parashikuar një rënie me 90 milionë dollarë e të ardhurave. Dyshja Rama-Meta është gati ta miratojë me forcën e kartonëve këtë ndryshim”, ka thënë Basha.
Basha e ka cilësuar skemë mashtrimi edhe aksionin kundër informalitetit, duke kaluar më pas në temën e dekriminalizimit.
“Askush nuk do t’i shpëtojë dekriminalizimit. Edi Rama mendon se duke shkarkuar dikë do të shpëtojë, por kjo është një valë që nuk ndalet”, ka thënë Basha.
Komisioni për dekriminalizimin, sipas Bashës, do të nisë shqyrtimin e procedurave për këtë ligj.
“Kërkojmë edhe dorëheqjen e kryetarit të Kuvendit Ilir Meta, pas të dhënave të publikuara në agjencitë rajonale të lajmeve. Kërkojmë dorëheqjen e Saimir Tahirit, që është nyja e narkotrafikut. Këto janë kërkesat e PD për daljen nga kriza që ka përfshirë vendin. Këto kërkesa do t’i cojmë përpara me qytetarët në turin politik që do të ndërmarrim në mbarë vendin”, theksoi kreu I PD-së, duke paralajmëruar aksion. /tesheshi.com/
