Shtetet e Bashkuara të Amerikës duket se i kanë marrë plotësisht në duart e tyre zhvillimet më të rëndësishme në Shqipëri e Kosovë.
Pas problemeve që shpërthyen në Tiranë në post-vizitën e Edi Ramës në Shtëpinë e Bardhë, si dhe pas zgjdhjes së Hashim Thaçit si president i Kosovës, zv.presidenti i Shteteve të Bashkuara, Joe Biden do të vizitojë Tiranën dhe Prishtinën në mes të muajit qershor.
Burime diplomatike i thanë tesheshi.com se zv.presidenti Biden do të jetë prezent në seancën e parlamentit shqiptar kur do të votohen në parim ndryshimet kushtetuese në kuadër të reformës në drejtësi.
Duket se Uashingtoni është kujdesur në detaje për të gjitha votat që do të mblidhen për të votuar këtë reformë, e konsideruar historike për Shqipërinë e post-komunizmit, megjithë kundërshtimet e prishtshme. Deri në atë datë do të jetë ambasadori amerikan në Tiranë Donald Lu që do të vazhdojë konsultimet me parlamentarë të veçantë për të përzgjedhur një nga një 4 votat që duhen për reformën.
Pas bojkotit të fortë që ish-kryeministri Sali Berisha dhe disa ish-ministra i bënë ambasadorit amerikan në Tiranë, mësohet se Uashingtoni ka marrë seriozisht situatën dhe nuk do të dështojë, në një kohë kur e ma marrë vetë përsipër si miratimin ashtu dhe zbatimin e reformës në drejtësi.
Në një kohë kur Rusia po harxhon para të pafund për të destabizlizuar Ballkanin, duke ngritur madje edhe media në gjuhën shqipe dhe lobuar në një pjesë të politikës, Uashingtoni është i alarmuar për një tronditje në dy vendet që janë sferë e tij të aleancave, si Shqipëria e Kosova, ku njëri është anëtar i NATO-s e tjetri ka mbi 5 mijë trupa të Aleancës Veriatlantike brenda territorit, si dhe bazën më të madhe ushtarake të SHBA-së në rajon.
Axhenda e zv.presidentit amerikan në Tiranë dhe Prishtinë ende pritet që të plotësohet dhe caktohet me detaje disa ditë para nisjes, por siç mësohet, numri dy i Shtëpisë së Bardhë, Joe Biden, do të mbajë një fjalim të rëndësishëm para deputetëve të Shqipërisë, pikërisht për reformën në drejtësi. Ai pritet do të ndajë “shapin nga sheqeri”, duke thënë edhe masat konkrete për ata që do të votojnë kundër reformës, e në këtë rat do të cilësohet si votë kundër SHBA-së.
Ndërkaq, Biden do të takojë vetëm krerët e politikës që do të mbështesin me votën e deputetëve të tyre reformën në drejtësi.
Po ashtu, edhe në Kosovë, zv.presidenti i SHBA-së, do të mbajë një fjalim në parlament ku do të shprehë qëndrimin se Uashingtoni nuk do të tolerojë një destabilizim të vendit dhe për këtë pritet të japë edhe një mesazh në bazën ushtarake të Bondsteel.
Lëvizjet e shpeshta diplomatike të Uashingtonit në Tiranë e Prishtinë, por edhe në Kroaci, Bullgari dhe Rumani, janë kundërpërgjigje të manovrave ruse për të destabilizuar Ballkanin.
Zv./presidenti Biden pritet që në qershor të jetë prezent dhe në Budva të Malit të Zi, ku do të zhvillohet një samit për sigurinë, i ftuar nga qeveria e Podgoricës.
Përgatiti: Ermir Hoxha – /tesheshi.com/
