Nga Mensur Krasniqi
Axha Nuri është sot 77 vjeç. Që do të thotë se 77 vjet më parë, në Shkup ndodhi një çudi e madhe që theu të gjitha parimet e mjekësisë. Vetë axha e e quan veten “mrekullia e shtatë” e kësaj bote.
Sepse mënyra e ardhjes së tij në jetë, ka qenë diçka e pazakonshme, dhe nuk dihet nëse ndokush deri më tani ka pasur fatin e njëjtë me të.
Siç dihet, në bazë të praktikës mjekësore muaji normal i lindjes në shtatëzani është muaji i nëntë. Por ka edhe raste të atilla kur fëmijët lindin para se të mbarojë cikli i plotë i shtatzanisë, respektivisht në muajin e shtatë të saj, duke u quajtur ndryshe dhe shtatanikë.
Mirëpo asnjëherë nuk është dëgjuar që dikush të ketë lindur pas ciklit të plotë të shtatzanisë, jo me ditë por me muaj, edhe pikërisht në të 12-in.
E kjo i ka ndodhur axhës Nuri dhe nënës së tij që e solli në jetë.
Dhe Axha Nuri, për portalin tesheshi.com ka rrëfyer diçka mbi këtë lloj lindjeje, ashtu siç i’a ka rrëfyer atij nëna e vet.
“Unë kam pasur një lindje të çuditshme. Nuk e di nëse dikush në botë ka patur fatin tim. Nëna ime ka qenë në muajin e nëntë të shtatëzanisë, periudhë kjo kur normalisht duhej të më lindte mua. Por e pranishme në një dasëm të familjes sonë aso kohe, ajo është përfshirë në gëzimin familjar dhe është ngritur të kërcejë një valle. E ky moskujdes, asaj i ka kushtuar shumë, pasi foshnja, pra unë, ka rënë nën barkun e saj, gjë që më pas ka pamundësuar lindjen normale. Kështu, duke mos pasur mundësi të vizitohet tek gjinekologu, shtatëzania e saj ka vazhduar deri në muajin e 12-të. Kjo do të thotë se unë kam qëndruar në barkun e saj të lidhur me konop tre muaj më shumë nga sa është dashur, derisa kanë filluar t’i paraqiten dhimbjet dhe pastaj t’më lind në ambient shtëpiak. Nëna ime më thoshte se kur kam lindur kam peshuar sa një mulli i kafeje i vogël, sepse gjatë 3 muajve shtesë të shtatzanisë unë nuk kam thithur asgjë nga ushqimi saj në bark, por kam qenë nën mëshirën dhe mbrojtjen e Zotit”, shprehet kështu Nuri Iseni.
Dhe vërtet, axha Nuri i është falënderues Zotit meqë përpos parregullsive në shtatëzaninë e nënës së tij, ai sot e kësaj dite jeton pa ndonjë problem fizik dhe shëndetësor.
“Ka dashur Zoti që unë të lindi pa asnjë të metë fizike e as shëndetësore. Kam pasur një jetë të njëjtë sikur të tjerët. Mënyra e lindjes sime është vetëm një dëshmi më tepër se Zoti është mbi çdo gjë”, vazhdon tregimin e tij axha Nuri.
E veçanta tjetër: kravata
E ndonëse i shtyrë në moshë, ai tregon se nuk i ka ndodhur që ndonjë ditë ta dalë nga shtëpia pa kravatë.
“Ka 60 vite të plota që unë mbaj kravatë edhe atë për çdo ditë. Kështu ishte edhe derisa shkoja për në punë. Edhe pse kisha profesionin e elektriçistit, unë ndjehesha krenar me veten dhe dëshiroja të dukem zotëri para të tjerëve dhe assesi nuk e kam bërë nga mendjemadhësia”, përfundoi tregimin e tij axha Nuri. /tesheshi.com/
