Ndonëse ka kohë që është paralajmëruar se Gjykata Speciale do nisë punën në muajin qershor, siç duket kjo nuk do të ndodhë edhe për disa muaj. Të paktën kështu thotë avokati ndërkombëtar, Gregor D.Guy Smith sipas të cilit Specialja, nuk pritet që të aktivizohet edhe për disa muaj të tjerë, pasi procedurat do të marrin më shumë kohë.
Smith në një intervistë për “KosovaPress” konfirmon se ka biseduar me një numër të personave që mund të gjykohen nga Gjykata Speciale, por nuk ka treguar emrat e tyre.
“Unë kam punuar me Tomë Gashin, kemi qenë një ekip për një periudhë të gjatë kohore dhe nuk kemi punuar vetëm në Prishtinë, por edhe në Hagë dhe po ashtu kemi një zyre në San Francisko. Sa i përket pyetjes së nëse na kanë kontaktuar, po na kanë kontaktuar. Një çështje e drejtë e interesit është se kush do akuzohet, cilat do të jenë ato akuza dhe si do të vazhdojnë këto raste. Nuk mund të përmend se me kënd kemi biseduar specifikisht, por kemi biseduar me një numër të madh të palëve. Ne kemi qenë pjesë e çdo rasti në Kosovë që kanë pasur të bëjnë me ish-pjesëtarët e UÇK-së“, tha Smith.
Smith, i cili ka mbrojtur ish-komandantin e UÇK-së Ramush Haradinaj në Gjykatën Ndërkombëtare në Hagë, thotë se nëse Haradinaj do të ndiqet edhe nga Specialja, do të ishte shkelje absolute e sundimit të ligjit.
Ndryshe, gjatë javës përmes një njoftimi të Gjykatës Speciale, është bërë e ditur se nëntë pika të rregullores së procedurës dhe provave të Dhomave të Specializuara të Gjykatës Speciale nuk janë në përputhje të plotë me Kushtetutën e Kosovës. /tesheshi.com/
