Në emisionin në gjuhën maqedonase, “Moj Termin”, njëri nga avokatët e familjarëve të të vrarëve në Liqenin e Smillkovës, i njohur ndryshe si rasti “Monstra”, thotë se ka marrë leje nga familja e viktimave që ta publikojë një dëshmi tronditëse për opinionin.
Sipas tij, ekziston telefonatë e përgjuar në të cilën dëgjohet kryeparlamentari i Maqedonisë, Trajko Veljanovski duke i fshehur gjurmët e vrasjeve të pesë të rinjve në Liqenin e Smillkovës.
Avokati thotë se në përgjime dëgjohen po ashtu edhe 5 funksionarë të tjerë duke i fshehur gjurmët dhe të cilët janë të implikuar në rastin e vrasjes.
“Nuk e keni idenë se si bëjnë pazarllëqe nën tavolinë me rastin “Monstra”. Përveç Trajko Veljanovskit i cili dëgjohet në telefonatë duke tentuar që të fsheh gjurmët e zbardhjes së rastit në fjalë, ka edhe 5 funksionarë tjerë që janë të implikuar në këtë rast. Unë tani kam marrë leje që ta ndaj këtë informatë edhe me opinionin e gjërë, që ta dijnë të vërtetën. Telefonata e përgjuar shkon nga dora në dorë dhe sillen shumë para veç të asgjësohet si dëshmi”, ka thënë avokati i viktimave nga rasti “Monstra”.
Kujtojmë se 7 shqiptarë janë dënuar me burgim të përjetshëm për rastin “Monstra”, pra ngjarjen e rëndë të Liqenit të Smillkovës, ku për palët e ndëshkuara dhe opinionin shqiptar në Maqedoni, nuk ekziston asnjë argument formal dhe material nga Gjykata Themelore e Shkupit që të mund të provojë akuzën dhe legjitimojë dënimet. M.Krasniqi – /tesheshi.com/
