Dhomat e Specializuara të Kosovës, ditë më parë publikuan listën prej 40 juristëve që janë pranuar në Listat e Mbrojtësve dhe tashmë mund të përfaqësojnë të dyshuar, të akuzuar, një grup viktimash ose këdo tjetër që gëzon të drejtën e përfaqësimit juridik në procedurat para gjykatës.
Në mesin tyre 15 janë nga Kosova, 7 nga SHBA-të, 5 nga Britania, 8 nga Serbia, një nga Holanda, 2 nga Kanadaja, një nga Mali i Zi dhe një nga Maqedonia.
Në mesin e avokatëve nga Kosova janë edhe avokatët Arianit Koci dhe Tahir Rrecaj, të cilët paralajmërojnë se shpejt mund të ngriten aktakuzat e para.
Avokati Koci në një intervistë për emisionin “Përballje” të TV Dukagjinit ka deklaruar se gjykata është funksionalizuar dhe se tashmë priten vetëm veprimet e Prokurorisë Speciale, shkruan Telegrafi.
“Nuk besoj që ka arsye që kjo mu zvarrit edhe më tutje, besoj që shpejt mund të ndodhin veprimet e para, mund të vijnë ftesat e para por edhe bastisjet e para”, u shpreh Koci.
Në anën tjetër avokati Tahir Rrecaj ka theksuar se ngritja e aktakuzave të para nga kjo gjykatë mund të ndodhin në verën më së largu vjeshtën e këtij viti.
“Gjatë verës së këtij viti eventualisht fillimi i vjeshtës së këtij viti Gjykata do të funksionalizohet, pasi që me akreditimin e avokatëve tashmë janë kryer të gjitha kërkesat e nevojshme që gjykata të jetë funksionale”, ka thënë Rrecaj.
Dhomat e Specializuara dhe Zyra e Prokurorit tё Specializuar tё Kosovës u formuan nё bazë tё Amendamentit Kushtetues dhe Ligjit tё miratuar nga Kuvendi i Kosovës për gjykimin e pretendimeve të paraqitura nё raportin e Këshillit tё Evropës tё vitit 2011, për shkelje tё rënda tё sё drejtës ndёrkombёtare.
Dhomat janë tё përkohshme dhe me mandat e juridiksion tё përcaktuar, konkretisht për krime kundër njerëzimit, krime lufte dhe krime tё tjera tё përkufizuara nё Ligjin e Kosovës, tё cilat pretendohet se janë kryer midis 1 janarit 1998 dhe 31 dhjetorit 2000. /tesheshi.com/
