Vazhdon debati për uljen e Ramush Haradinajt në tavolinë me Thaçin e Mustafën. Kryetari i AAK-së Dega në Prishtinë, Avni Arifi, përmes një postimi në Facebook i është kundërpërgjigjur liderit të VV-së, Visar Ymerit, i cili ka deklaruar Haradinaj ka gabuar që ka shkuar në takim tek presidentja.
Arifi e ka quajtur të pa qëlluar dhe irritues këtë vlerësim të Ymerit.
“Për ata që nuk e dinë,AAK është subjekt i pavarur politik pavarësisht partneritetit politik që tani ka me VV dhe Nismën. Qëndrimi i saj në kauzë nuk mund t’i imponohet nga askush as në formë as në përmbajtje aq më pak në dëgjueshmëri. Sa i përket takimit, askush nuk doli më i palumtur se sa Thaçi dhe Isa. Kjo u pa me fyerjet që ky i fundit bëri në komunat e Dukagjinit, po të njëjtën ditë. AAK i dha një shans të pastër dialogut dhe nëse ky takim ka shërbyer për atë pjesë të pabindur të shoqërisë, si konfirmim se zgjidhja e krizës nuk është në tavolinë dhe dyshja Mustafa-Thaçi nuk janë të interesuar për dialog, për të cilin aq shumë thirreshin”, ka shkruar Arifi.
Megjithatë, përkundër këtyre deklaratave mospajtuese, dy partitë në fjalë kanë konfirmuar se do të vazhdojnë rrugën e bashkuar kundër qeverisë dhe nuk do të përçahen, siç po raportohet në media. /tesheshi.com/
