Parlamenti i sotëm u karakterizua nga një mishelë debatesh e replikash mes zgjedhjeve në Dibër e trafikut të drogës, sidomos pas lajmit të paradites se një avion i vogël ishte rrëzuar në zonën e Ishmit.
I pari që e deklamoi këtë fakt ishte deputeti demokrat, Flamur Noka, ish-ministër i Rendit dhe njëherësh anëtar i komisionit të sigurisë, i cili nuk ngurroi që ta lidhte atë me trafikun e drogës, në të cilin sipas tij është përfshirë qeveria.
Por nga ana tjetër, autoritetet e Rendit thanë se në avionin e rrëzuar nuk ishte gjetur asgjë e dyshimtë, pra as drogë. Italiani që po e drejtonte atë, 69-vjeçari Andrea Guidi, tha se kishte dalë për një shëtitje në qiell dhe se një defekt e kishte detyruar të bënte ulje, pa e ditur se ku. Ndërsa autoritetet e AlbKontrollit thanë se ai nuk kishte leje fluturimi.
Për opozitën nuk ka dyshim që avioni në fjalë është dëshmi e trafikut të drogës. Kreu i PD-së, Lulzim Basha tha se ky trafik tashmë po zhvillohet në çdo rrugë e me çdo mënyrë.
Por nga ana tjetër ngjan e habitshme koiçidenca që avioni vjen e ulet në tokën shqiptare sapo nis punimet seanca plenare, duke patur si lajmëtar ta parë deputetin Noka, e ku Dibra nis e harrohet për t’u zëvëndësar nga “droga qeveritare”.
Sakaq, zëra gazetareskë autoritativ, siç është ai i Artan Hoxhës, po nxjerrin në pah disa të dhëna kompromentuese, gjë që të çon të mendosh se vërtet droga duhet të ketë qenë shkaku i uljes së avionit në tokën shqiptare. Dhe bëhet fjalë për një terren ku dora e njeriut ka ndërhyrë për t’i dhënë formën e një piste.
Pra, vërtet që në avion nuk ka patur drogë, por ai është plot pikëpyetje që dalin më të fuqishme se justifikimi i italianit në moshë që gjithçka e ia lë etjes shpirtërore për t’u relaksuar në kaltërsi, deri në humbjen e orientimit që e çon si padashje nga Italia në Shqipëri. /tesheshi.com/
