Një incident ka ndodhur mëngjesin e sotëm në aeroportin “Ataturk” të Stambollit, që gjendet në pjesën europiane të metropolit turk.
Avioni i kompanisë ajrore Mahan Air nuk ka arritur të parkohet ashtu siç duhet në orën 08:30 të kësaj të enjteje, duke u përplasur me një rrethim betoni.
Airbus-i A310, që vinte nga Teherani, dëmtoi pjesën e përparme të tij, por dëmtoi gjithashtu dhe një autobus të transportimit të udhëtarëve që gjendej në anën tjetër të pengesës.
Nuk ka patur të lënduar nga përplasja e avionit, porse mbetet ende i paqartë shkaku i tij.
Incidenti i sotëm pason atë të ditës së shkuar në aeroportin në pjesën aziatike të Stambollit, Sabiha Gökcen, kur nga një shpërthim humbi jetën një punonjëse e personelit të pastrimit dhe u plagos një tjetër. /tesheshi.com/
