Edhe një herë tjetër sulmet ajrore ruse në Siri kanë marrë jetë civilësh. 12 fëmijë e tre të rritur, përfshirë një mësues, u vranë ndërsa avionët rusë goditën një shkollë në Anxhara, në provincën e Halepit.
Observatori Sirian për të Drejtat e Njeriut bëri të ditur gjithashtu se veç të vrarëve ka dhe 20 të plagosur, të gjithë nxënës e fëmijë.
Ky është rasti i dytë brenda pak ditësh që rusët godasin civilët në zonat e banuara. Tre ditë më parë u goditën prej avionëve rusë banesa e tregje në Idlib, e për pasojë u vranë më shumë se 50 civilë e u plagosën mbi 100 të tjerë.
Shqetësim për sulmet ajrore ruse mbi civilët sirianë ka shprehur dhe Departamenti Amerikan i Shtetit.
“Ne vazhdojmë të jemi të shqetësuar rreth raportimeve për viktima civile të shkaktuara nga sulmet ajrore ruse… Ky mbetet një shqetësim, çfarë po godasin ata, dhe po aq me rëndësi, çfarë nuk po godasin,” ka deklaruar zëdhënësi i Departamentit të Shtetit, John Kirby. /tesheshi.com/
