Ahmed Assiri, zëdhënësi i Ministrisë së Mbrojtjes së Arabisë Saudite, i deklaroi një ditë më herët televizionit Al Arabiya se vendi i tij ka dërguar tashmë avionë luftarakë në bazën ajrore të Inxhirlikut në Turqi me synimin për të intensifikuar luftën kundër ISIS-it.
Mbretëria saudite, sipas tij, ishte e angazhuar t’i instensifikonte luftimet kundër ISIS-it, dhe kjo lëvizje ishte në kuadër të këtyre përpjekjeve.
Por në bazë ka ende vetëm avionë sauditë, e jo trupa tokësore, për dërgimin e të cilave ka ende diskutime.
Sidoqoftë, dërgimi i trupave tokësore mbetet akoma shumë i mundshëm. Rusia ka paralajmëruar se dërgimi i trupave të huaja tokësore në Siri mund të nxisë një luftë botërore. Ndërkohë, si Arabia Saudite dhe Turqia janë të shqetësuara nga ndihma e dhënë Esadit prej Rusisë. Forcat e regjimit sirian, me mbështetjen e sulmeve ajrore ruse, po përparojnë së fundi në Halep.
Një zhvillim tjetër i rëndësishëm është nisja e goditjeve të kurdëve të YPG-së prej Turqisë. Të cilësuar si terroristë nga Turqia, objektivat e YPG-së janë goditur për herë të dytë këtë të dielë në veri të Sirisë, pas goditjeve të dhëna dje. Bombardimet e djeshme nga forcat turke qenë në përgjigje të sulmeve të YPG-së ndaj një baze ushtarake dhe një stacioni policor turk.
Kryeministri turk, Ahmed Davutogllu, tha të shtunën se YPG-ja është përfshirë në spastrimin etnik ndaj arabëve dhe turkmenëve në rajon së bashku me trupat e regjimit të Esadit. YPG-ja është krahu i armatosur i PYD-së, degës siriane të PKK-së, organizatës terroriste kurde që është në luftë të hapur me shtetin turk. /tesheshi.com/
