Mundësia për një qeveri LDK-VV vijon ende. Edhe pse dy ditë më parë patën një fërkim në parlament, duke lënë të kuptuar se PAN mbetet alternativë e vetme, takimi i së premtes mes Albin Kurtit dhe Lutfi Hazirit e riktheu në skenë variantin e një kabineti mes tyre. Për më tepër ata kanë caktuar dhe negociatorët për vijimin e bisedimeve, të cilët do jenë Dardan Sejdiu dhe Avdullah Hoti.
“Në veçanti, ata konsideruan nevojën e bashkëpunimit midis LV dhe LDK (përkatësisht LAA) për trajtimin dhe harmonizimin e programeve politike e qeverisëse, për të cilën janë ngarkuar Dardan Sejdiu dhe Avdullah Hoti, që me ekipet respektive të zhvillojnë dhe intensifikojnë takimet dhe bisedimet e përbashkëta në ditët në vijim”, ka shkruar në Facebook aktivisti i VV-s, Erzen Vraniçi.
Kjo rinisje e bisedimeve mes LDK-së dhe VV-së, vjen pas deklaratës së bërë dje nga kreu i PDK-së, Kadri Veseli, i cili tha se do të japë votën e tij për Albin Kurtin nëse ky i fundit arrin të bëjë 60 vota për formimin e qeverisë.
Të njëjtin premtin ka dhënë edhe deputeti i NISMA-s, Bilal Sherifi, i cili po ashtu ka thënë se nëse ky koalicion dëshmon se i ka 60 vota për qeverinë, do e ketë dhe votën e tij. /tesheshi.com/
