Nga Blendi Gashi
Kandidati për kryeministër i koalicionit LDK, AKR, Alternativa, Avdullah Hoti, në fushatën zgjedhore po vazhdon të shfaqë vetëm anën e tij si një ekonomist i dalluar për çka edhe vlerësohet në opinion, ku po bën premtime kryesisht të kësaj fushe; por që ende nuk po arrin të shfaqet si një lider i kalibrit më të madh, gjë që është normale për një kohë kaq të shkurtër, ku ngacmon kundërshtarët, ballafaqohet ashpër me ta dhe ua thotë të palarat që mund të kenë.
Katër ditët e kaluara të fushatës kanë treguar se Hoti ende është nën hijen e liderit të partisë, Isa Mustafa, i cili siç dihet në postin e kryeministrit erdhi me një fushatë të egër anti-PDK, anti-SHIK, edhe pse në fund përfundoi në krahët e tyre.
Edhe në këtë fushatë, Mustafa po shihet shumë më i ashpër karshi rivalëve ku po godet në vazhdimësi PDK-në për të cilën po thotë se e ka kapur shtetin, si dhe Vetëvendosje-n, të cilës po ia përmend gazin lotsjellës, sulmet e shtëpive e djegien e veturave.
Ndërsa Hoti në katër ditët e kaluara ka shfaqur anën e tij të vërtetë, pra të urtin, për çka njihet i tillë, ndërsa ka drejtuar shumë pak gishtin ndaj kundërshtarëve.
Kjo heshtje e tij po vazhdon edhe pas akuzave që rivalët ia bëjnë atij duke e quajtur një kandidat jo të denjë për kryeministër dhe cilësuar si “të duhur” vetëm për të drejtuar Administratën Tatimore por jo diç më shumë e cila nuk qëndron.
Akuzat më të mëdha që ka bërë Hoti ndaj rivalëve është quajtja e PDK-AAK-NISMA-s si “koalicion i territ”.
Ndërsa në çdo komunë ku shkon, Hoti prioritet i ka dhënë programit për ekonominë ku ka premtuar rritje ekonomike për 8 për qind, unifikimin me rrjetin energjetik në Shqipëri, ndërtimin e termocentralit “Kosova e Re”, 40 mijë të punësuar brenda mandaitit etj.
Premtimet për zhvillim ekonomik janë të mirëpritura kur dihet gjendja ekonomike në vend, por për të siguruar avantazh ndaj rivalëve për kryeministër, Hoti duhet të tregojë vetën edhe përtej ekonomisë, pra të japë ide konkrete për intergrimin eventual të veriut, për zgjidhjen e çështjes së Demarkacionit e tema tjera që cilësohen të mëdha, në mënyrë që të tregojë se nuk është një lider i paguximshëm, siç cilësohet.
Hoti si një njeri i pakorruptuar dhe i vlerësuar si ministër i Financave, ka mundësinë t’i mëshojë shumë korrupsionit dhe të tregojë se çfarë do bëj konkretisht në fushën e sundimit të ligjit, e cila ka nevojë për një këndellje urgjente.
Andaj nuk mjafton deklarimi se “do e çkapë shtetin”, kur nuk tregon se në ç’mënyrë do e bëjë, dhe ç’do bëhet me fatin e zyrtarëve të korruptuar.
Në ditët e mbetura të fushatës, Hoti duhet të ashpërojë paksa gjuhën, të dalë jashtë kornizës së një profesori të mirë të ekonomisë, dhe të tregojë para qytetarëve se jo vetëm ata që e godasin fortë tavolinën janë të guximshëm dhe mund ta drejtojë shtetin, por se mund ta bëj edhe gjëra të mëdha pikërisht në tavolinë.
Hoti, krejt në fund për të ecur në rrugën e një lideri të pranueshëm është i detyruar të ikë nga hija e Mustafës dhe të tregojë se ka planin e tij për ta qeverisur vendin.
Padyshim se zgjedhjet e 11 qershorit janë një test i madh për të, ku përfundimisht do mësohet nëse mund të jetë një lider i së ardhmes apo jo. /tesheshi.com/
