Pas deklaratave të ashpra kundër Shqipërisë dhe Turqisë nga ana e ministrit të Mbrojtjes së Greqisë, dhe ditën kur Vangjel Dule dhe Ilir Meta sulmuan Edi Ramën se po tregohet i ashpër me Athinën, janë aktivizuar tensionet ndëretnike.
Në Himarë mëngjesin e sotëm është ngritur flamuri grek në kalanë e qytetit.
Nga ana tjetër, në aksin rrugor Tepelenë-Gjirokastër është shkruar me bojë parrulla “Vorio-Epir, tokë greke”.
Ndërkohë në Greqi ka patur raportime të ndryshme në media për të dëbuar nga vendi emigrantët shqiptarë.
Ministrja e Mbrojtjes, Mimi Kodheli ka qenë e vetmja zyrtare shqiptare që ka reaguar ndaj deklaratave të homologut të saj grek, Kamenos.
Në një status në Facebook ministrja thotë se NATO u krijua për të bashkuar vendet demokratike, teksa i quan deklaratat si një përpjekje për të ngritur fantazma të së shkuarës.
“NATO u krijua për të bashkuar vendet demokratike të hemisferës veriore përballë çdo rreziku totalitar. Por sot e kam të vështirë të kuptoj pse ndonjë politikan në Ballkan vesh uniformë ushtarake dhe përpiqet të ngrejë fantazma të së shkuarës. Kanë ikur kohët e satrapëve”, shkruan Kodheli.
Ndëraq kreu i LSI-së Ilir Meta ka akuzuar Tiranën zyrtare se po tensionon situatën. Në fjalimin e mbajtur në Konventën e LSI-së, Meta tha se “distancohemi nga qëndrimet e ashpra që prishin miqësinë si nga Tirana dhe nga Athina, por pa e specifikuar se për çfarë bëhej fjalë”.
Kurse kreu i PBDNJ-së, Vangjel Dule ka qenë më i ashpër, duke e akuzuar Ramën se synon të zbehë rolin e Athinës në rajon.
“Më shumë se kurrë, në moment ku ka deklarata që disa herë nga të gjitha palët mund të kalohen edhe vijat tradicionale, dëshmohet se miqësia mes popullit shqiptar dhe atij grek është e pandikueshme nga cdo qeveri. Greqia ka bërë, me prova, pavarësisht se dikush me qëllimet e veta mikro-partiake, përfshirë kryeministrin Rama, ka kërkuar ta eklipsojë këtë fakt, avokatinë më sistematike në proceset integruese për vendin tonë”, tha Dule. /tesheshi.com/
