Fermerët janë duke pasur vështirësi për t’i shitur viçat për shkak se Agjencia e Ushqimit dhe Veterinës (AUV) nuk i ka pajisur me matrikuj (numrat që i vendosën kafshëve në vesh), gjë që e ka obligim ta bëjë në javët e para kur të lindin viçat. Tesheshi.com ka kontaktuar me disa fermerë të Komunës së Podujevës dhe ata janë ankuar që ka disa muaj që AUV nuk ka vendosur matrikujt tek viçat e sapolindur dhe kjo gjë po iu shkakton telashe të shumta.
Nxehmi Hyseni, fermer i cili ka dhjetëra lopë dhe viça ka thënë për tesheshi.com se mungesa e matrikujve për viçat e sapolindur po u shkakton vështirësi për t’i shitur, pasi që njerëzit hezitojnë për t’i blerë për shkak se konsiderohet si blerje ilegale dhe nëse policia ia zënë viçat pa matrikuj i konfiskon dhe kjo gjë është shqetësuese.
“Nga data 9 nëntor e vitit të kaluar nuk ka matrikuj dhe krejt viçat që i kam prej kësaj kohe janë pa matrikuj. Dje isha në Agjencinë e Ushqimit dhe Veterinës (AUV) dhe më thanë se diku edhe për dy javë do të bëhen matrikujt e reja. Unë kam vështirësi shumë sepse nuk po mund që t’i shesë viçat, sepse nëse policia ia ndal blerësit viçat pa matrikujt, automatikisht ia konfiskon dhe ky është një problem i madh, sepse jemi kufizuar në shitje”, thotë fermeri Hyseni.
FSBK: Fermerët mund ta humbin të drejtën për të aplikuar për grante dhe subvencione
Në lidhje me këtë çështje, tesheshi.com ka kontaktuar dhe me Federatën Sindikale të Bujqve (FSBK). Kryetari i FSBK-së, Tahir Tahiri ka thënë se kanë marrë shumë ankesa nga bujqit për shkak të mungesës së matrikujt pasi që ka një kohë të gjatë që AUV nuk ka shpërndarë matrikujt.
“Federatës Sindikale e Bujqve të Kosovës iu kanë paraqitë shumë ankesa të bujqve për mungesë të matrikujt, të cilat e ka për detyre t’i sigurojë Agjencia e Ushqimit dhe Veterinës. Fermerët që kultivojnë viça për majmëri nuk mund t’i shesin ata pa ua vu matrikujt (numrat) në vesh, sepse gjatë transportit rrezikojnë me ju konfiskuar nga Policia. Edhe fermerët që e kanë rritë numrin e gjedheve qumështore (mështjerrat janë bërë me viça) duhet për t’i matrikujt, sepse është kusht për të marrë subvencione dhe grante nga MBPZHR-ja (Ministria e Bujqësisë, Pylltarisë dhe Zhvillimit Rural. Matrikujt po mungojnë që tre muaj dhe sipas një bisedës që FSBK-ja ka zhvilluar ma AUV-in, ato do të vonohen edhe nja 3-4 muaj gjoja për procedura të tenderimit.”, thotë Tahiri.
Ai dyshon se kjo mund të bëhet edhe me qëllim që një pjesë e fermerëve të mos mund që të aplikojnë për subvencione, pasi që është e domosdoshme që gjedhet të jenë të pajisura me matrikull për të aplikuar për të përfituar subvencionet.
“Ne si FSBK dhe bujqit dyshojmë se kjo mungesë bëhet me qëllim që një numër i caktuar i bujqve me humbë rastin për të aplikuar për grante dhe subvencione të MBPZHR-ja (Ministria e Bujqësisë, Pylltarisë dhe Zhvillimit Rural), ngase ka kërkesa të shumta. Kurse Qeveria ka ndarë buxhet shumë të vogël dhe nuk arrijnë që t’i mbulojnë kërkesat e drejta të bujqve, ky është një diskriminim i radhës që ju bëhet bujqve që ë plotësojnë kriteret për aplikim”, thotë Tahiri.
Ai i ka bërë thirrje AUV-së që sa më shpjet të fillojë shpërndarjen e matrikujt në mënyrë që fermerët të mos kenë vështirësi në shitjen e viçave dhe aplikimin për subvencione dhe grante.
Ndërkaq, Ministria e Bujqësisë Pylltarisë dhe Zhvillimit Rural, ende nuk i ka shpallur konkurset për grante dhe subvencione, por ka njoftuar se kjo do të bëhet së shpejti, ndërsa ka ftuar të gjithë fermerët që të aplikojnë.
AUV nuk ka datë se kur mund të jepen sërish matrikujt
Siç duket fermerët do të duhet të presin edhe një kohë për marrë matrikujt për gjedhet e tyre, kjo për faktin se kompanive që e kanë fituar tenderin iu ka skaduar kontrata dhe tash duhet të nënshkruhen kontratat e reja dhe të shpallen fituesit e ri. Por dihet se këto procedura janë të zgjatura, dhe në nëse shpallet tenderi sa më shpejt dhe zgjidhet fituesi, kontrata nuk mund të ekzekutohet pa pritur afatin për ankesa, e nëse ka ankesa nga kompani që kanë konkurruar, shqyrtimi i saj merr shumë kohë dhe mund edhe që të anulohet, gjë që merr shumë kohë.
“Tani për tani është ndaluar vendosja e matrikujve tek kafshët shtëpiake, sepse subjekteve veterinare iu ka skaduar kontrata për kryerjen e këtij shërbimi në terren. Drejtoria e Shëndetit dhe Mirëqenës se Kafshëve se bashku me zyrën e prokurimit janë në fazat përfundimtare të lidhjes së kontratave me subjektet veterinare të licencuara. Jemi duke bërë përpjekje që sa më shpejte të jetë e mundur do te procedojmë me nënshkrimin e kontratave”, ka thënë Lamir Thaçi, zyrtarë për informim në AUV, duke mos precizuar se kur do të fillojë ndarja e matrikujve. /tesheshi.com/
