Ilir Meta i jep fund ankthit të Edi Ramës për Paktin e ri Detar me Greqinë.
Në mbrëmje, Presidenti i Republikës ka dhënë autorizimin për nisjen e negociatave me Athinën, duke i hapur kështu rrugë vizitës së Alexis Tsipras në muajin prill në Korçë.
Njoftimi për dhënien e autorizimit është kumtuar ndërkohë kur dy ministrat e Jashtëm të të dy vendeve, Bushati dhe Kotzias u takuan në Bruksel.
Tashmë negociatorët do të takohen për ta mbyllur teknikisht me harta çështjen e Detit për të zhbllokuar kështu vizitën e kryeministrit grek, Alexsis Tsipras për Pashkët Ortodokse në Korçë më 8 prill.
“Presidenti autorizoi nisjen e negociatave Shqipëri-Greqi për kufizimin e zonave te tyre detare nëe përputhje me vendimin e Gjykatës Kushtetuese, akteve ndërkombëtare, kuadrit të brendshëm ligjor në interes të ruajtjes dhe ushtrimit të sovranitetit teritorial juridiksionit kombëtar, garantimit të sigurisë, dobisë ekonomike e sociale të vendit”, thuhet në njoftimin e Presidencës.
Meta e mbajti pezull çështjen për dy muaj duke kërkuar garanci dhe detaje nga ministria e Jashtme, pasi sipas kreut të shtetit si “nuk mund të japë autorizimin pa zbatuar pikë për pikë vendimin e Gjykatës Kushtetuese”. /tesheshi.com/
