Masat shtypëse të qeverisë kineze ndaj popullsisë muslimane në Xinjiang, një rajon në perëndim të vendit, kanë kaluar në një stad tjetër.
Një listë emrash për foshnjet e porsalindura e përjashton vendosjen e emrave me ngjyrim fetar, posaçërisht për muslimanët në këtë rajon.
Lista e emrave të ndaluar, thekson The Guardian, del në mes të një aksioni shtypës ndaj fesë, që përfshin ligjet kundër mbulesave dhe mjekrave.
Si masë dënuese për fëmijët që do të kenë këtej e tutje emra fetarë do të jetë pamundësia për të patur të siguruara shërbimet shoqërore, kujdesin shëndetësor e arsimimin.
Human Rights Watch është një prej organizmave që kanë reaguar ndaj masës më të fundit shtypëse ndaj popullsisë muslimane në Kinë.
“Kjo është më e fundit në një varg rregullash të reja që kufizojnë lirinë fetare në emër të kundërvënies ndaj ‘ekstremizmit fetar’. Këto politika janë shkelje e hapur e të drejtave të lirisë së besimit dhe shprehjes,” thoshte një deklaratë e drejtueses së këtij organizmi për Kinën.
Në Xinjiang jetojnë gjysma e rreth 23 milionë muslimanëve të Kinës, dhe popullsia vendase është vijimësisht nën masat shtrënguese të autoriteteve për shkak të besimit të saj. /tesheshi.com/
