Autoritetet e vendit amerikanolatin kanë vijuar ta kenë nën mbikëqyrje aktivitetin e vullkanit Kalbuko, i cili shpërtheu të mërkurën për herë të parë në më shumë se 50 vite. Një tjetër shpërthim pati një ditë më pas, të enjten, gjë që solli largimin e rreth 5.000 njerëzve nga zona pranë tij.
Ato druhen se në vullkanin mund të hapet një krater tjetër, duke sjellë me gjasa një shpërthim të ri. Zyrtarët kilianë të fushës përkatëse deklaruan se niveli i rrezikut nuk ka njohur rënie, dhe ata besojnë se Kalbuko mund të hapë një krater të ri e të krijojë një shpërthim më të fuqishëm.
Kalbuko është një prej tre vullkaneve më të rrezikshëm në Kili, dhe shpërthimi i tij pasoi atë të vullkanit Villarika më herët këtë vit.
Vullkani Kalbuko gjendet 1.400 kilometra në jug të kryeqytetit Santiago, dhe pati shpërthyer për herë të fundit më 1961. Kili ka mbi 90 vullkane aktive.
Autoritetet shpallën gjendjen e jashtëzakonshme, dërguan ushtrinë, dhe larguan njerëzit në një hapësirë 20 km rreth vullkanit pas shpërthimeve të mërkurën në mbrëmje dhe të enjten në mëngjes. Deri tani nuk ka njoftime për të lënduar. /tesheshi.com/
